Curry-a'n record thar siam

Stephen Curry chuan NBA record thar a siam leh ta a, Golden State Warriors-in Zirtawpni zinga Orlando Magic 130-114 a an hneh ṭumin a zawna match 128 nan three point a score leh a ni.

Atlanta Hawks small forward Kyle Korver chuan a zawna match 127 chhung match tinah three point a score thei a, he record duhawm tak hi Warriors point guard Curry hian a rawn khum.

Kum 27-a upa Curry hian Magic nena an inkhelh ṭum hian point 51 ngawt a score leh a, tun season-a a vawi thum nan point 50 a score tling. Season liam taa NBA Most Valuable Player hian assist vawi riat a neih bakah rebound vawi riat a la bawk.

NBA season kal mek-ah Warriors hian match 57 khelh tawh aṭangin vawi 52 hnehna an chang tawh a, season khata chak tam ber chu Chicago Bulls niin 1995-96 season khan match 72 an chak.