Europa League-ah English club chak vek

Premier League club Tot-tenham Hotspurs, Manchester United leh Liverpool te'n an khingpui hnehin Europa League last 16 an lut.

Ningani zan khan Europa League last 32 second leg khelh a ni a, English club pathum la damten an mualah result ṭha an hlawhchhuak. White Hart Lane-ah Tottenham-in Italian club Fiorentina lakah 3-0 in phuba an la a, Serie A club hi season liam taa Spurs petchhuaktu an ni. Old Trafford-ah Manchester United-in Danish club FC Midtjylland chu 5-1 in an sawp a, Anfield-ah Liverpool-in Bundesliga club Augsburg 1-0 in a hneh bawk.

Kane tel loin

Spurs-in Harry Kane tel loin Fiorentina hneh an harsat lo a, Ryan Mason-a'n first half-a goal a khung hnuah second half-a Erik Lamela pet goal leh Viola captain Gonzalo Rodriguez-a'n an lama a tihluh hmangin 3-0 in a chak.

Tottenham-in kum 1984-a UEFA Cup an champion hnuah European competition-ah nomawi an la chawi leh lo a, tun ṭum hi champion-na hun ṭha a ni. Amaherawhchu Spurs-in Italian club laka khel ṭha kum 19-a upa Dele Alli-a'n first leg-a yellow card a hmuh tawh hnuah Ningani zana hun tawp dawna yellow card a hmuh avangin last 32-ah an chhawr thei lo ang.

Denmark-ah warm up-naa inhliam vangin United-in David de Gea an chan a, Old Trafford-ah warm up-naah Anthony Martial a inhliam a, a aia lut chu kum 18-a upa Marcus Rashford a ni. FC Midtjylland-in an muala Manchester United 2-1 a an hneh hnuin Old Trafford-a Pione Sisto hmangin hma an hruai a, United ṭantute an hawi buai hman hle.

Inkhela chungnung zawk chunga goal nawr na tawk lo United-in Nikolay Bodurov own goal hmangin first half-ah an siphurh an sut hlauh a, Juan Mata-a'n penalty hlah mah se second half-ah rawlthar striker Rashford-a'n goal hnih a khung a, Ander Herrera-a'n penalty aṭanga a khung belh bakah inkhela che ṭha ber Memphis Depay-a'n United goal nga na a khung bawk.

Rashford hi kum 18 leh ni 117 a upa niin United tana European competition-a goal khung naupang ber a ni a, kum 1964-a George Best-a record siam a khum. United tan Manchester khaw tlangval Rashford-a che
ṭha hi a lawmawm a, chutihrualin Federico Macheda leh James Wilson ten United tana an match hmasa berah goal an khung ve tho tih hriat a tel a ṭha.

Reds an chak

Liverpool-in last 32 first leg-a goal an khung loh hnuah Augsburg lakah 1-0 in hnehna an chang a, last 16 an lut.

Anfield-a inkhelah goal a lut hma a, inkhel ṭan aṭanga minute 5-na lekah German club midfielder Dominik Kohr chuan handball vangin penalty a chawi a, Liverpool tan James Milner-a'n goal-ah a chantir.

Augsburg-in Lucas Leiva back-pass sual vangin chance nei mah se Brazilian forward Caiuby-a'n an hun ṭha neih a chhawr
ṭangkai thei lo a, hun tawp dawn hnaih lamah Reds keeper Simon Mignolet chuan Tobias Werner pet ṭha takin a dang bawk.

Liverpool manager Jurgen Klopp chuan, "Team ṭha zawk kan nih avangin chak kan phu a ni. Chance tam tak kan insiam a, kan buaina erawh kan hun
ṭha neih kan chhawr ṭangkai thei lo kha a ni," tiin goal tam zawk khung thei an nih thu a sawi.

Inkhel dang

Gary Neville-a kaihhruai Valencia-in first leg-a 6-0 zeta an sawp tawh Austrian club Rapid Vienna lakah zahngaihna an lantir lo a; Rodrigo Moreno, Sofiane Feghouli, Pablo Piatti leh Ruben Vezo te goal hmangin khualmualah 4-0 in an chak.

United player hlui Neville hian Valencia-ah bul ṭan ṭha lo mah se Rapid Vienna ṭum hnih a hneh bakah league lama Espanyol leh Granada te an hneh tawh bawk avangin a zawnin vawi li an chak ta. Valen-cia bakah Spanish club dang champion lai Sevilla, Athle-tic Bilbao leh Villarreal ten hnehna an chang a, German club Borussia Dortmund leh Bayer Leverkusen ten last 16 an lut bawk.