Zaninah Madrid Derby khelh a ni dawn
Madrid khaw club inhal pa-hnih Real Madrid leh Atletico Madrid-te chu zanin dar 8:30 hian an inhmachhawn dawn a, Spanish football ngainatute tan Madrid Derby hi hmaih phal chi a ni lo.
Real Madrid manager thar Zinedine Zidane-a'n Champions League-a a match hmasa berah a naute a chakpui tawh a, second leg khelh la hmabak mah se an dinhmun a him tawhah ngaih a ni.
French legend hian player a nihna angin Madrid Derby vawi tam khel tawh mah se mana-ger a nih hnuah erawh Derby a la hmachhawn lo a, zanin hi Real manager a nih hnua league match-a fiahna tak tak a hmachhawnna hmasa ber tur a nih dawn avangin zanin inkhel tur hi football khawvelin a ngaihven lo thei lo.
Tun hnai dinhmun
Real-in an match hnuhnung pangaah tlawm hmel an hmu lo a, Madrid Derby an hma-chhawn hma an match hnuhnung berah Malaga chu 1-1 a an inhnehtawkpui avangin an boruak ṭhat lai erawh a ni lo.
Atletico Madrid-in an match hnuhnung pangaah vawi hnih chak hmel an hmu a, vawi khat tlawmin vawi hnih an khingpuite an inhnehtawk pui thung.
Team pahnih hi tun hnai an inhmachhawn pangaah pawh an inngam tawk hle. Vawi thum chak zawk awm loinan inhnehtawk a, vawi khat ve ve hnehna an chang a ni.
Inlan tur
Real Madrid-in an player pawimawh Gareth Bale, Pepe, Marcelo leh Karim Benzema-te chu hliam vangin an chhawr thei dawn lo vek a, hei vang hian Spanish club youth player Enzo Fernandez, Carlso Abad, Marcos Llorente, leh Martin Odegaard-te chuan senior team training an zawm. Heng zinga ngaihven hlawh ber erawh Zidane-a fapa Enzo Fernandez a ni a, zaninah a inlan a nih chuan football khawvel mit fukna tur a ni ang.
Atletico Madrid tan Cham-pions League last 16-a PSV nen an inhnehtawk ṭuma inhliam Stefan Savic a inlan thei dawn lo a, Tiago Mendes leh Belgium international Yannick Carrasco-te chu hliam vangin chhawr theih an la ni dawn lo bawk.
Beiseina nen Ronaldo
Real Madrid-in league table-ah pathumna dinhmun an luah a, a chung bera awm Barcelona chu point kuain an phak lo mek a, an chung chiaha awm Atletico hi point khatin an phak lo bawk.
Barcelona-in hma hruai fal mah se Real thiampuipa Cristiano Ronaldo chuan beisei-na an la neih thu a sawi. Portugal captain chuan, "Football-ah chuan beisei loh tak tak a thleng fo a, engpawh thleng thei a ni. Zaninah hian inkhel ropui tak kan chhawp chhuah ka beisei a, hnehna kan chan ngei ka ring a ni," tiin chak a beisei thu a sawi.
Diego Simeone-a naute'n goal khung harsat ṭhin mah se an tlarhnung lam an khawng ṭha a, tun season La Liga inkhel an hma-chhawn tawh 25-ah goal 11 chiah an la chhuah a, Ronaldo tan hmun dang aiin goal khung a harsa dawn.
Barca inlan dawn
Inrinni zanah Madrid Derby an khel ang a, Pathianni zan dar 1:00-ah Barcelona chuan Sevilla an mikhual ve thung ang.
Inelna hrang hrangah Barce-lona-in ngamtu an la tawng meuh lo a, Sevilla an hmachhawn hmaa Champions League-a an match hnuhnung berah Arsenal chu khualmualah 2-0 in an hneh.
Sevilla-in chak an duh a nih chuan tun season-a goal 41 khung tawhtu Luis Suarez, goal 29 khungtu Lionel Messi leh goal 23 khungtu Neymar-te an ven uluk a ṭul ang.
Team pahnih an inhmachhawn hnuhnung pangaah Barcelona an chungnung zawk a, Catalan club hian vawi thum hnehna changin vawi khat an inhnehtawk a, Sevilla-in vawi khat hnehna an chang ve a ni.