Muller-a'n dik taka thil tih a duh

Bayern Munich hma-tawng Thomas Muller chuan football-ah chuan dik lo deuh hleka hming-
ṭhatna hlawh chhuah tum ai chuan dik leh ṭha taka mahni theihna zawng zawng senga inkhelh a
ṭhat zawk thu a sawi.

Germany international hian tun season-ah a club tan inelna hrang hrangah goal 25 khung tawhin a ṭhiante goal khung tur vawi 11 a siamsak tawh bawk a, an ramah chuan naupangte ngaihsan leh entawn a ni mek.

Kum 26-a upa Muller chuan, "A chang chuang ka hnehnah naupangte an lo kal a, anni chuan thilmak leh danglam bik hmuh an chak thu an sawi fo. A ruk deuha thil tih dante min zawt ṭhin. Mahse, kei chuan a lem ai chuan a tak chu a tawpah a hlut zawk thu ka lo hrilh mai zawk ṭhin," a ti.

Tun season Bundes-liga khelh mekah Muller hian match 22 a khelh tawh aṭangin goal 17 a khung tawh a, zanin dar 8:00 a Wolfsburg khel tura an kal hunah pawh Bayern tlarhma ti chaktu ber pakhat a ni leh ngei ang.

Zanina inkhel tur team pahnihte hi an inthlau hle a, Bayern striker Robert Lewandowski leh Muller hian an pahnihin league goal 39 an khung tawh a, hei hi Wolfsburg player zawng zawngte khung zat aiin goal sarihin a tam zawk.