Inter aiin Juve ka duh zawk - Dybala

Juventus forward Paulo Dybala chuan season tira Palermo a chhuahsan dawn khan Inter Milan pawhin an sawm a, mah se Turin Club a thlan zawk thu a sawi.

Pathianni zan dar 1:15 hian Serie A hmahruaitu Juventus chuan Inter hi an lo mikhual dawn a, Juve tan match 25 a khelh aṭanga goal 13 khung tawh Dybala hi player enrawn bik a nih pawhin a mak lo ang.

Inter coach Roberto Mancini chuan tun hmain Dybala hi a lo be tawh a, mah se Palermo player hlui hian San Siro pan a tum loh thuin a chhang.

Argentina International kum 22-a upa chuan, "Nipui transfer lai khan Mancini hian min rawn bia a, an hnena kal tura min sawm avang khan ka lawm hle. Mahse, ka rilru chuan Juve hi a thlang sa tawh a, a chhan chu team lian leh ṭha zawk nia ka hriat vang a ni," tiin a sawi.

Italian champion Juve hian Thawh-lehni zan khan Champions League-a an mikhual German champion Bayern Munich chu 2-2 in an inhnehtawk pui a, he inkhelah hian Dybala chuan goal khat a khung ve a, UEFA competition-a a goal hmasa ber a ni nghe nghe.

Tun dinhmunah Old Lady (Juve sawina) hian Serie A-ah point 58 hmuin hma-hruaitu an ni mek a, pahnihna Napoli nen an inthlauhna chu point hnih chauh a ni.