League Cup Nomawi inchuh tur Liverpool leh Manchester City
Pathianni zan dar 10:00-ah England-a khelmual hming-thang Wembley-in League Cup final a thleng dawn a, Liverpool leh Manchester City-te'n tun season-a nomawi chawi hmasa ber nih an inchuh dawn.
Tun hmain League Cup-in ngaihhlut hlawh tawk lo mah se Chelsea, Manchester City leh Tottenham Hotspur-te'n team lian an elphak hnuah nomawi chawi a har a, Premier League club-te'n League Cup an enhniam thei tawh lo.
Liverpool tan Jurgen Klopp-a'n a nomawi hmasa ber chawi a duh ang a, season thara City chhuahsan tur Manuel Pellegrini-a'n a hmaa inchhawp nomawi hi chawi loh a duh bik lo ang.
Liverpool thlirna
Reds-in League Cup final hmaa an match hnuhnung berah Augsburg hneh mah se penalty aṭang bakin goal an khung lo a, goal khung harsat team hian City lakah goal an khung thei ang em? tih hi zawhna awm thei chu a ni.
Liverpool tana chanchin lawm-awm erawh Philippe Cou-tinho leh Daniel Sturridge-te'n ngai an awh chho leh tawh hi a ni. Europa League-a an inkhelah player pahnih hi an hmuhnawm a, City tlarhnung tan anni pahnih hi ven uluk an ngai ang.
Reds manager Jurgen Klopp-a'n League Cup final khel dawn mah se Augsburg an hmachhawn ṭumin a player ṭhate a chawlh hahdam tir lo.
German coach chuan, "Stur-ridge leh Coutinho-te hi kan tana player pawimawh tak an ni a, an ṭhat dan bera khel chhuak tur erawh chuan training bakah match an khelh tam a ngai a ni," tiin a player pahnih chu League Cup final thlira chhawr a nih thu a sawi.
City ve thung
Manchester City-in season thar atana an manager tura Pep Guardiola an puan hnuah result duhawm nei hleithei lo mah se Champions League-ah result duhawm an hlawh chhuak a, Dynamo Kiev chu last 16 first leg-ah 3-1 in an sawp. Citizens hian phur takin Wembley an pan ang.
Liverpool tlarhnung tan Ukrai--nian club laka khel ṭha tak pahnih Sergio Aguero leh David Silva ringawt pawh hi buai-puitham an ni dawn a, tlar-hnung lamah captain Vincent Kompany a dam leh tawh bawk avangin Reds hna hi a hautak dawn.
Belgium international Kom-pany chuan, "Kiev laka kan khelh dan ang khan kan khelh chhuah a ngai dawn a, kan rilru puthmang ang kha kan pu reng tur a ni," tiin Cham-pions League-a an result ṭha chu Wembley lamah an chhawm theih a beisei thu a sawi.
Inlan tur
Liverpool tan Adam Lallana lo kir hun tur a chiang lo a, Joe Allen leh Martin Skrtel chu malpui hliam vangin an la chawl mek. Reds defender Dejan Lovern chu dam lohna avangin a inlan theih dawn leh dawn loh a chiang lo bawk.
Manchester City tan Wil-fried Bony chu chhawr theih tura a lo kir beisei a ni. Hliam vanga chawl zingah Samir Nasri, Kevin de Bruyne, Jesus Navas leh Fabian Delph -te erawh chhawr theih an la ni lo thung.
Team pahnih
Liverpool-in inkhel an hma-chhawn hnuhnung pangaah vawi hnih hnehna an chang a, vawi hnih an khingpuite inhnehtawkpuiin vawi khat an tlawm thung.
Manchester City-in tun hnaia inkhel an hmachhawn pangaah vawi hnih chiah hnehna an chang thei a, vawi thum an tlawm.
Tun hnaia team pahnih in-hmachhawn vawi ngaah erawh Liverpool an chungnung zawk. Merseyside club hian vawi thum hnehna changin vawi khat an tlawm a, vawi khat an inhnehtawk bawk a ni.
Team pahnih inhmachhawn hnuhnung ber November khan Etihad Stadium-ah Liverpool hian 4-1 in hnehna an chang a, League Cup final-a Manchester khaw club hmachhawn hi an huphurh hran lo ang.