Khualmualah Aizawl FC tan fiahna

Mizoram Premier League champion Aizawl FC-in coaching staff thar an neih hnuah hneh loh an la nei lo a, Pathianni zan dar 7:05 hian Bengaluru FC-in an mual Sree Kanteerava Stadium-ah Jahar Das leh a hote an fiah ang.

Thawh hnihna

I league-ah team pakua an awm a, vawi hnih ṭheuh an inkhel kual dawn. Tunah hian vawi khat ṭheuh an inkhel chhuak tawh a, tun dinhmunah hian season tawp se Mohun Bagan an champion nawn dawn tihna a ni a, Goan club Salgaocar an relegate ang a, Aizawl FC an him thung ang.

Aizawl FC hi vawi khat khelh kual zawha an him avangin an him chiang tihna erawh a ni lo. Team tinin khualmualah vawi riat ṭheuh match an nei a, Aizawl FC hian Phase 1-ah khan Rajiv Gandhi Stadium, Mualpuiah match nga zet an khelh avangin Phase 2-ah chuan khualmualah vawi nga zet an khelh a ṭul dawn.

Tun ṭuma Aizawl FC zin chhuak hian Bengaluru FC an hmachhawn zawh hian March 2-ah Mumbai FC an tlawh leh nghal dawn a, match hniha an result hian season tawpa an dinhmun tur thui takin a hril ang.

Team Dinhmun

Aizawl FC-in an match hnuhnung bera Mumbai FC an hneh ṭuma an squad chu a hnuaia tarlan ang hi a ni.

Aizawl FC XI (4-3-3): Zo-than-mawia, Lalruat-thara, Lalram-chullova, Lal-chhawn-kima, Ricky Lallawmawma, H. Lalbiakthanga, R. Malsawm-tluanga, Zoramthara, H. Lal-muan-kima, Alfred Kemah Jaryan, Albert Zohmingmawia.

Subs: Lalawmpuia, Immanuel HS Lalthazuala, Emma Chigozie, Yuta Kinowaki, Brandon VL Remdika, William Lalnunfela, Joel Sunday.

Bengaluru hmachhawn turin Aizawl FC-in player 20 an hruai a, Mumbai FC hnehtu team
aṭangin Immanuel HS Lalṭha-zuala, Lalchhawnkima leh Brandon VL Remdika te inhliam vangin an tel thei lo a, an pathum bakah hian Zoramthara an hruai lo bawk.

Aizawl FC hian zin chhuak turin player 20 an hruai a, Mumbai FC hmachhawn squad-a tel lo - captain David Lalrinmuana, Ronald Zothanzama, Lalṭha-kima, Lalramzauva Khiangte leh Nagaland Striker Khwetelhi Thopi an hruai tel bawk.

Engtin zel?

Aizawl FC head coach Jahar Das-a'n Mizo coach K. Mal-sawm-kima thlawpna a hmu
ṭha tih a hriat a, Bengali coach hnuai-ah H. Lalmuankima'n harhtharna changin Mumbai FC lakah Bawngkawn tlangval hian goal a khung bakah assist a nei a, hero of the match a thlan a ni.

Tun ṭumah hian defender Chhawnkima a inhliam avangin Ronald Zothanzama emaw Lalṭhakima emaw chuan chance an hmuh theih hmel a, an lut ta lo a nih chuan Nigeria defender Emma Chigozie-a'n I League-ah hmingchherna hun ṭha a nei ang.

Mizo mipui beiseina erawh Joel Sunday a ni a, Nigerian striker hian Saturday-a match hmasa berah Aizawl FC tan goal a khung a, Sunday-ah goal a khung leh thei ang em? tih hi zawhna a awm thei chu a ni.

Aizawl FC technical director Hmingthansanga chuan, "Coa-ching staff thar hnuaiah result ṭha tak kan nei a, Bengaluru lakah pawh hian chhawm nun zel kan duh. Team boruak a
ṭha a, MK-a te an rawn chet ṭhat takah chuan kan squad a chhah tawk tih kan hmu a, tlarhnungah Chhawnkima inhliam mah se Ronald, Ṭhakima leh Emma te kan neih avangin kan buai phah lo ang. Kan khingpui Bengaluru hian ṭantu an nei ṭha a, keini pawhin Bengaluru Mizote hnen aṭangin ṭawiawmna kan hmu ang," tiin Vanglaini palai a hrilh.

Bengaluru lam

AFC Cup-ah Bengaluru-in Laos club Lao Toyota FC hneh lo mah se Aizawl FC an hmachhawn hunah chuan chak zawk tura rin an ni.

Bengaluru-in Osana Curtis goal hmangin RG Stadium-ah Aizawl FC an hneh tawh a, MPL champion-in player thar an neih ang bawkin 2014 I League champion-in Michael Collins an la lut. English midfielder hian Ashley Westwood hnuaiah hmun pawimawh a chang nghal.

Blues hian champion ngei an tum a, chuvangin Aizawl FC laka point thum an hlawhchhuah loh chuan an lawm lo ang. Lao Toyota FC an hneh loh ṭumin Bengaluru tan Mizo panga Lalthuammawia, Lalchhuanmawia Fanai, Beingai-chho Beikhokhai, Malsawmzuala leh Daniel Lalhlimpuia te a inlan vek a, Aizawl FC an khelh hunah pawh hian khelhna hmun an chan leh beisei a ni.

Zaninah Bagan

I League hmahruaitu Mohun Bagan-in vawiin tlai dar 4:30 hian Goa-ah Salgaocar an tlawh dawn a, Ma-riners-in pakhatna dinhmun hauh zel turin chak an mamawh. Kolkata club tan Jeje Lalpekhlua a che ṭha zel a, Mizo tlangval hian Bagan-in AFC Cup-a Maziya Sports an hneh
ṭumin goal hnih a khung.