Leicester hmaah Norwich Swansea mikhual tur Spurs

Zanin dar 8:30-ah Premier League hma-hruaitu Leicester City an inlan dawn a, an khel-mualah Norwich City an mikhual dawn avangin hmahruai zel turin an dinhmun a ṭha hle.

Pathianni zan dar 7:35-ah Tottenham Hotspur an inlan dawn bawk a, Foxes hnuai chiaha awm Spurs hian manager thar hnuaia insiamṭha mek Swansea City an mikhual thung ang.

Ranieri a zam lo

Leicester City mana-ger Claudio Ranieri chuan Norwich City nena an inkhel tur thlirlawkin, "Hmahruaitu kan nih vang maiin kan naute an talbuai lo a, an rilru puthmang a ngai reng a, an huaisen em em a ni. Mahse, hetiang dinhmuna kan vawi khat dinna a nih avangin inrintawkna nei turin ka fuih reng a ni," tiin an buai loh thu a sawi.

Italian manager chuan sawi chhunzawmin, "Ka naute hnena ka sawi chu Arsenal kan hneh loh ṭum ai khan tuna kan match hi a pawimawh zawk. Hmasawn zel kan duh a, kan awmna ngaia awm reng kan duh. Kan hmabak match nga tala kan chak theih chuan kan dinhmun hi a ṭha dawn hle a ni," tiin hmahruaitu nih zel an tum thu a sawi.

Spurs beiseina

Europa League last 16 lut hlim Tottenham hi an phur vanglai tak a nih avangin White Hart Lane-a lenchilh hi Swansea City tan a phurawm loh hle ang.

Fiorentina laka 3-0 a hnehna an channa in-khelah Spurs tan Harry Kane chu hliam vangin inlan thei lo mah se Swansea erawh a hma-chhawn theih beisei a ni a, Welsh club tan chan-chin lawmawm a ni lo.

Spurs boss Mauricio Pochettino chuan, "Pre-mier League table-ah pahnihna niin hmahruaitu kan phak lohna hi point hnih chiah a ni a, kan dinhmun ngaihtuah hian a phurawm a, Swansea City hmachhawn tur hian kan inpeih a ni," tiin a phur hle.

Tottenham leh Swan-sea hi Premier League-ah vawi kua an inhmachhawn tawh a, Spurs-in vawi sarih hnehna changin Swansea-in chak hmel an la hmu ve lo a, vawi hnih an inhnehtawk a ni.