Zaninah India leh Pakistan inhmachhawn dawn

Asia Cup khelh mekah India chuan zanin dar 7:00 hian Pakistan an hmachhawn dawn a, khawvela ram inhal ber pawl inhmachhawn turin cricket ngainatute hmuh chak a ni.

India hian an match hmasa berah Bangladesh chu run 45-in an hneh tawh a, Pakistan tan Asia Cup-a an match hmasa ber tur a ni thung. Pakistan tan match-fixing vanga kum nga hrem a nih lo kir leh pacer Mohammed Amir inlan dawn leh dawn loh hian ngaihven a hlawh hle.

Hetihlai hian Bangladesh an hmachhawn ṭuma hliam nei chunga khel lui Mahendra Singh Dhoni chu a inlan theih dawn leh dawn loh a chiang lo a, India captain hi a inlan thei lo a nih pawn Parthiv Patel a awm avangin India tan buaina tur a awm lo ang.

India tan tun hnaia che ṭha thei tak Rohit Sharma chu innghahna a ni lehin a rinawm a, Indian opener hian Bangladesh an hnehna inkhelah ball 55 hmachhawnin run 83 a siam a ni.