Man United chhanhimtute; an sel ṭhin Maguire leh Onana

UEFA Champions League-ah Manchester United-in hnehna an chang ta a, point thum hlawhchhuahna kawnga 'hero' chu anmahni ṭantu ngei pawhin uchuak taka an sawisel leh diriam Harry Maguire leh Andre Onana te an ni.

October 24, Thawhlehni zan khan Man United-in Old Trafford-ah FC Copenhagen 1-0 in an hneh a, Maguire-a'n chakna goal khungin hun tawp hma chiahin Onana-a'n penalty a dang bawk.

Group A inkhel dangah Bayern-in Galatasary 3-1 in an hneh a, German club hi match thumah an chak vek. Bayern-in knockout stage an hnaih a; Galatasaray (4 pts), Man United (3 pts) leh Copenhagen (1 pt) ten hmunruak dang pakhat an inchuh ang.

Beisei pha lo

Man United-in Bayern leh Galatasaray an hneh tawh lo a, an maulah chuan Copenhagen awlsam taka an hneh mai a rin theih. Mahse, Danish club hian bul an ṭan ṭha zawk a, goal khungna chance pawh an nei ṭha zawk.

Copenhagen forward Elias Achouri-a'n keeper Onana tan hna a siam nghal a, hemi hnu lawk hian Diogo Goncalves-a'n goal ban a pet per. Mohamed Elyounoussi pawhin hun ṭha a hlah.

Rasmus Hojlund, Antony leh Scott McTominay te hmangin mualneitu lamin Copenhagen tlarhnung rum ṭhaih bawk mah se an mamawh goal hmuh tur a awm lo.

Second half ṭantirhah pawh Copenhagen bawkin bul an ṭan ṭha a, Lucas Lerager-a ball pet ṭha zet chu Onana-a'n hming ṭhat nan a hmang.

United ṭha zawk

Christian Eriksen-a luh hnuah United khel a nung sawt a, Danish midfielder hian Marcus Rashford leh Hojlund te thawhrah sengin goal a khung teuh hle.

Minute 72-naah Eriksen-a cross chu Maguire-a'n ṭha zetin a tauh goal a, Old Trafford-ah thawm a ṭha hle. Hojlund leh McTominay te hnathawh ṭha chu Alejandro Garnacho-a'n a khung thei lo a, keeper dan per chu McTominay-a'n a khung thei lo bawk.

Injury time-ah McTominay a chesual a, penalty a chawi. Jordan Larsson-a penalty oet chu Onana-a'n a dang a, United-in point thum an sual chhuak.

Chanchin a danglam ta

Khelmualah Harry Maguire chesual nasa a, diriam a hlawh hial. United pawhin an ring zo tawh lo a, captain nihna an hlihsak. Nipui bazar khan West Ham hnenah hralh an tum a, club lam inrem vek tawh mah se Maguire a chhuak duh lo.

England coach Gareth Southgate-a'n ring reng mah se Ten Hag erawhin a laia khel turin Luke Shaw a ring zawk. Mahse, tunah chuan Maguire-a'n Copenhagen lakah chakna goal a khung a ni ringawt lo a, Bramall Lane-a Sheffield United an hneh ṭumin man of the match a ni tawh bawk.

David de Gea a thlak miau avangin Onana-a'n en bik a hlawh a, pre season friendly-a Maguire a hauh vang leh hla tak aṭanga ball pet a chhuah avangin inelna tak ṭan hmain pressure a neih belh.

United chetsuala mawhpuh rawn ber Maguire-a khelh phak loh laia sawisel berah Onana a ṭang chho a, tihsual bakah tih ṭhat tawk loh a ngah. Mahse, £47m man keeper Onana hian hun pawimawhah penalty a dang a, kawng dik a zawh chho leh ta.

Chutihrualin Man United hian October 29, Pathianni hian an hmelma Manchester City an mikhual nghal dawn a, Maguire leh Onana te chauh ni loin United hmabak a harsa dawn hle.