Santosh Trophy group stage top scorer Mapuia

77th National Football Championship group stage khelh zawh tawh a ni a, final round khel tur team 12 a chiang tawh. Group stage-a goal khung tam ber chu Mizo tlangval Lalkhawpuimawia a ni.

Kelkang tlangval Mapuia hian I League club-ah pawh khelhna la hmu mah se tun season-ah Chanmari FC tan a khel a, Mizoram team-in an ṭhatpui. Mapuia hian match nga aṭangin goal riat a khung a, group stage bikah a khung tam ber.

Mizoram striker Mapuia hian Services lakah goal ropui khungin bul a ṭan a, DNH&DD lakah hattrick (goal li) khungin Sikkim lakah chakna goal a khung. Uttarakhand lakah Mapuia'n goal a khung lo a, he match-ah chiah hian a khung lo. Group match hnuhnung berah Pondicherry lakah goal hnih a khung leh a, DNH&DD leh Sikkim an hneh ṭumin man of the match a thlan a ni.

Mizoram coach Lalsangzuala Hmar chuan, "Mapuia hi kan team tan malsawmna a ni a, goal a khung bakah team tan a ṭangkai. Player tlan ber zinga mi a ni a, a thawkrim a, Mizoram tan a theihna zawng zawng a hlan," tiin Vanglaini a hrilh.

Mapuia hi match zawng zawngah a khel tluan vek a, striker ṭha a nih ang ngeiin a lu leh ke a hmang thiam. A lu hmangin goal thum a khung a, a ke dinglam hmangin goal nga a khung. Mizo tlangval hnuaiah hian Assam forward Dipu Mirdha leh Services forward Samir Murmu te an awm a, goal sarih ve ve an khung.

Kelkang striker Mapuia hi Chanmari West, Dinthar FC, Chhinga Veng FC, Aizawl FC, Churchill Brothers leh NorthEast United tan a khel tawh a, Chanmari FC tan a khel a mek. MPL10-a goal thum khung tawhtu Mapuia chuan, "Pathian khawngaihna vang liau liau a ni. Top scorer ka ni hi ka lawm a, chutihrualin ka duh ber chu final round thlen a ni a, kan tumah kan hlawhtlin avangin ka lawm hle," tiin Vanglaini a hrilh.