Nghilh loh Bobby Charlton

Man United tan Bobby Charlton thih hnua Old Trafford-a an match hmasa ber a ni a, an legend hi urhsun takin an sun. Stadium luhna, holy trinity Charlton, George Best leh Dennis Law te lim zawnah chiah chuan 'Sir Bobby Charlton, 1937-2023, Forever Loved' tih chu chiang takin an ziak kalh.

Match programme kawmah Charlton-a thlalak a chuang kalh a, United ṭantute inkhel en tura kal hmain stadium kawtah Charlton thlah nan pangpar leh scarf an dah.

Charlton-a ṭhutna ṭhinah chuan pangpar dah a ni a, stadium-a thu puangtu chuan, "Sir Bobby Charlton, khawvelin English footballer a hmuh tawh zinga dak ṭha ber," tiin a rawn puang. Hemi zawh chiah hian baza pu (piper) Terry Carr chuan lunglenthlak takin United hlapui 'We'll Never Die' tih chu a rawn tum.

Baza pu hnungah Erik ten Hag-a'n pangpar mawi tak rawn kengin, Bobby a khelhpui ṭhin Alex Stepney leh U21 captain Dan Gore ten an zui bawk. Mual laia team pahnih player leh match official lo inrem ṭhapna lam an pan lai chuan mipui an reh ṭhap. Ngawi rengin Charlton thlan nan minute khat an ding zui.

Copenhagen ṭantute chuan, "Tih tak zetna leh inpekna hi player ṭha leh player ropui thliar hrangtu a ni. Sir Bobby Charlton, thlamuang rakin chawl ang che," tih banner chu an pawtparh ve bawk.

Sir Bobby Charlton hi United tan mi bik a ni a, Munich Disaster aṭanga dam chhuak zinga mi a ni a, chhiatna rapthlakah hian player pariat leh staff pathum an thi. Matt Busby-a'n team a din ṭhat lehna kawngah Charlton hi player pawimawh a ni a, a captain-na hnuaiah European Cup-ah an champion.

England-in 1966 World Cup nomawi an chawi khan Charlton hi player pawimawh a ni a, a thiamzia leh ṭhatzia nemnghettu chu Ballon d'Or, FWA Footballer of the Year leh FIFA World Cup Golden Ball dawng tawhtu a ni.