Odisha tan Isak-a'n goal a khung

Asia khawmualpuia club inelna sang ber dawttu AFC Cup-ah Thawhlehni zan khan Mizo tlangval Isak Vanlalruatfela chuan goal a khung a, ISL club Odisha FC chuan Maldives club ṭha Maziya S&RC chu 6-1 ngawtin an sawp.

Odisha hian minute thumnaah goal hmahruai an khung a, K. Lalṭhathanga (Puitea) khung niin a lang - Puitea hian Mourtada Fall ball tauh chu a kein a lo tawk a, goal-ah a lut. Mahse, official lamah Fall-a khung angin record a ni.

ISL club-in goal an khung hnuah Maziya hian Branimir Jocic hmangin minute 13-naah si phurh sut mah se, Odisha hian goal ngain an chhanglet leh zui - Carlos Delgado, Fall, Amey Ranawade, Isak Vanlalruatfela leh Sahil Panwar ten an khung ve leh a, hun a tawp meuh chuan 6-1 in Odisha an chak.

Odisha tana goal khungtu Isak-a chuan, "Tun season-a ka goal khung hmasak ber a ni a, tin, AFC Cup chu ram hrang hranga club ṭhate inelna a ni tawh bawk a, chuvang chuan ka goal khung pawh ka ngaihlu hle," tiin Vanglaini a hrilh.

Isak-a chuan sawi chhunzawmin, "AFC Cup danglamna chu ram pawn club nen kan intum a, hmasawn kan ngaihna laite hmuhchhuah a awl bik a, chutihrual chuan Maziya nena kan inkhelah pawh Indian player-ten hma kan lo sawn tawhzia a langin ka hria," a ti a, Asian football khelh chu hlawkthlak a tih thu a sawi.

Odisha tan hian Puitea leh Isak-a bakah Jerry Lalrinzuala chuan inkhel bul a ṭan bawk a, Mizo player pathum hi hun tawp hnaih lamah lakchhuah vek an ni.

Group D inkhel dangah ISL club tho Mohun Bagan erawh an chak zo lo a, an mikhual Bashundhara Kings nen 2-2 in an inhnehtawk. Kolkata club hian Dimitri Petratos leh Asish Rai hmangin vawi hnih ngawt hma an hruai.

Mahse, Bangladesh club hian tlawm duh bik loin, Dori leh Robinho hmangin an chhanglet leh ve ve a, 2-2 in an inhnehtawk. Mahse, Bagan hian match thum aṭanga point sarih hmuin hma an la hruai mek tho - Kolkata club tan hian Lalrinliana Hnamte (Terina) chu hun pek belhah bench aṭangin a lut.