Arsenal lawmna siamtu Jesus leh Martinelli

Gabriel Jesus-a'n goal mawi a khung bakah Gabriel Martinelli tan a siamsak a, inkhel hmuhnawm chhawp chhuak chungin Arsenal chuan Sevilla 2-1 in an luhchhuah - point ruk neiin Champions League group B hmahruaitu an ni.

Mikel Arteta naute hian an UCL match hnuhnung zawkah Lens 2-1 in an hneh lo, hun rei tak hnua European football inelna sang ber khel leh chauh an nih avangin an talbuai chhunzawm mai rinna pawh a awm hman, mahse Europa League vawi sarih champion tawh lakah an chungnung.

Laipui a puak

Arsenal manager Arteta-a'n Chelsea laka khel ṭha lo Oleksandr Zinchenko aiah Takehiro Tomiyasu chu inkhel bul ṭan turin a thlang a, a tisual lo hle. Japanese defender hian a hna a tlin takzet a, a venhim bakah goal nawr kawngah a thawh hlawk.

Sevilla lamin tawnhriat ngah Sergio Ramos an nei a, ani bakah hian Argentina international Marcos Acuna leh Spain international Jesus Navas leh Nemanja Gudelj te ho tlarhnunga an dah theih avangin an khawng ṭha viau.

Hun rei tak chhung pawh an inveng thei - mahse chawlhlawk hma deuhin Jesus chuan mual laiah ball a chang a, amah vengtu pahnih bum nan ball a vir pui hnuah Martinelli tan a pe, ani hian a tlan chakna hmanga ball la falin a khalh tlang.

Brazil international Martinelli hian Arsenal tan League Cup, Europa League leh UCL match a khelh hmasak berah goal a khung vek a, a laka beiseina neitu Arteta leh Arsenal fans ho beisei ang chhanna a pe.

Jesus bawk a inlar, minute 53-naah Declan Rice hnen aṭanga a ball naran hmuh chu box sir aṭangin a la lut a, goal chhak lam kilah a pet kum lut pawp. Sevilla lamin corner aṭangin Gudelj hmangin chhanglet ve mah se goal dang a lut tawh lo.

Lawm a kim lo

Hun tawp hma deuhin Jesus lakchhuah a ni a, bench aṭangin Eddie Nketiah a lut thung. Jesus an thlak chhan hi malpui hliam vang a ni a, a inkhelh chhunzawm theih loh thu manager a hrilh, eng ang taka hliam na nge a nih erawh a la hriat loh.

Arteta chuan, "Gabriel khan a khel ṭha êm êm a, mahse hun tawp dawna thlak dil ngai khawpa a awm mai kha a pawi hle. Tunah chuan a dinhmun ka sawi nghal mai thei lo, kan nghah leh rih deuh a ngai dawn a ni," tiin a sawi.

A chak lo zawk Sevilla coach Diego Alonso chuan, "Ka naute khan an theihtawp takmeuh an chhuah, goal khung pawh kan tum nasa. Mahse, a hmawr kan bawk thei lo, group match khelh hmabak pathum kan la neihah a ṭha thei ang bera tih kan tum ang," a ti.

Group B inkhel dangah RC Lens leh PSV Eindhoven te 1-1 in an inhnehtawk. Match thum ṭheuh an khelh tawh chinah Lens hian point nga hmuin Arsenal hnuaiah an awm a, an hnuaiah point hnih nei pahnih Sevilla leh PSV te an awm thung - beisei an la nei thei vek.