Coach thar hnuaiah Rune a chak

Tennis inelna Swiss Indoors an khel ṭan a, seeded pakhatna Holger Rune chuan set hmasa ber hloh hmasa zet mah se a khingpui Miomir Kecmanovic chu 1-6, 7-5, 6-3 a hnehin second round a invaw kai.

Kum 20 mi Rune hian coach thar a nei, a hming chu Boris Becker a ni. Grand Slam vawi ruk champion tawh Becker hian tennis khawvelah tawnhriat a ngah tawh, ani hnen aṭang hian thil tam tak a zir chhuak ngeiin a rinawm.

World number 6 Rune chuan, "A tir lamah khan ka khel ṭha lo, set khatnaa game khat chauh lak mai kha chu rilru pawh a hrehawm hman hle. Mahse, a hmawr ka bawk dan erawh duhthusama ṭha a ni thung," tiin a sawi.

Rune hian a ball vuak nat a chhawr ṭangkai thei hle, a match hmasa berah hian vawi 37 ngawt winners a vaw chhuak, second round-ah chuan Argentine tlangval Sebastian Baez nen an inhmachhawn leh ang.

Inkhel dangah seeded palina Hubert Hurkacz chuan Dusan Lajovic chu 7-6(2), 6-3 in a hneh ve bawk a, darkar khat leh minute 26 an inkhelh chhungin Hurkacz hian vawi 18 ngawt aces a vaw chhuak hman a ni.

Dominic Stricker pawhin second round lut turin Lebanese player Benjamin Hassan chu 7-6(2), 6-2 in a hneh, tualchhung tlangval hian hnehna chang turin darkar khat leh minute 31 chhung hun a hmang.