Fulham tan Marco Silva a rinawm

Premier League club Fulham boss Marco Silva chuan London club tan rinawmna thu a tiam a, 2025-26 season thleng enkawl turin contract thar a ziak - Fulham fan-te tan chuan chanchin lawmawm bik a ni ang.

Silva hian July 2021 khan Fulham hi Manager ni turin a zawm a, a contract neih lai hi tun season tawp ruala zo tur a ni. Mahse, London club-in Portuguese coach chelh an duh a, kum 2026 thleng an hnena cham turin contract thar an pe ta a ni.

Kum 46 mi coach hian Fulham hi 2021-22 season-ah khan Championship nomawi chawipuiin, Premier League a kaipui a, English top flight league-a an kirna season-ah 10-na a nihpui thei - kum 2012 hnua top 10 chung lama Premier League-a season an khar leh hmasak ber a ni.

Nipui laia Saudi Arabia club-ten an hel Silva chuan, "Contract thar chungchang hi hun rei tak kan lo sawi ho tawh a, hetianga contract thar ka ziak thei ta hi ka lawm hle a ni," a ti.

Silva chuan sawi zawmin, "Thawk ho kan ni a, kan thawhhonaah kan lawm a, kan hlim tlan chuan thil ṭha tak a ni. Ka hna ka la zo loah ka la ngai - season hnih duhawm tak kan hmang ho tawh a, kan tum ber chu Premier League-a ngelnghet taka awm tura he club kaihhruai hi a ni.

"Club neitute rinna leh thlawpna dawn hi thil ṭha tak a ni a, anni nena kan inpawhna hi tuna ka thutlukna siam nan hian a ṭangkai hle. Kan hmabak zinkawng i zawh ho zel ang u," a ti.

Tottenham Hotspur laka tlawm hlim Fulham hian tun season Premier League-ah match kua khelin vawi thum an chak a, vawi hnih draw neiin, vawi li an tlawm tawh - table-ah 13-na an ni mek.