Ronaldo-a la tar lo

Kum 38 ni tawh mah se Cristiano Ronaldo chuan a la rintlak reng tih khelmual chhungah a pholang nawn leh ta a, Thawhlehni zan khan AFC Champions League-ah goal hnih khungin Al Duhail lakah Al Nassr chu 4-3 in hnehna a chanpui.

Al Nassr tan Ronaldo-a'n goal hnih a khung bakah Talisca leh Sadio Mane ten goal khat ve ve an khung bawk - Qatari club ṭha Al Duhail lakah 4-3 in an chak a, match thum an khelhah point kua an hmu ta.

Saudi club Al Nassr hian Talisca, Mane leh Ronaldo goal hmangin 3-0 in hma an hruai hman a, mahse, Philippe Coutinho khelhna Al Duhail hian Ismail Mohamad leh Almoez Ali hmanga khung ve lehin 3-2 a ni a, beiseina an nei hman.

Mahse, Ronaldo bawk inlarin, minute 81-naah a khung ve leh a, Al Duhail tana Michael Olunga goal khungin awmzia a nei phak tawh lo - Al Nassr an chak a, last 16 lut turin an dinhmun a ṭha ta hle.

Ronaldo hian tun season inelna hrang hrangah match 13 khel tawhin goal 14 a khung tawh a, assist vawi sarih a nei - a kum zat ngaihtuahin a hnathawh a la ropui a, footballer vanglai hun hmang ang mai a ni.

Mahse, Ronaldo chuan, "Record tih lampang ka ngaihtuah lo a, Al Nassr-a ka hun hman hi nuam ka ti hle - team ṭha ber leh tawh khirh ber ni turin theihtawp kan chhuah reng a ni," a ti a, mimal ropuina aia team a ngaihhlut thu a sawi.

Season hmasaa Paris Saint-Germain enkawltu, Al Duhail boss Christophe Galtier chuan, "Ronaldo hmachhawn hi chuan tih theih vak a awm lo. Goal hnih mawi êm êm a khung a, a ṭhatzia hi thua sawifiah dan ka thiam lo. Kum 38 mi tan chuan a hnathawh hi a ropui a, khawvela ṭha ber a la ni reng a ni," a ti a, a fak hle.