Run 174 siamtu Quinton de Kock

South African batter Quinton de Kock chuan Thawhlehni zan khan run 174 ngawt a vaw chhuak a, South Africa chu Bangladesh lakah run 149 ngawtin hnehna a chanpui - Netherlands-in rin loh taka an hneh hnuah Proteas hian England leh Bangladesh hmachhawnin an sawp ve ve!

Wankhede Stadium, Mumbai-a inkhelah South Africa hi ṭhum vawrah an vannei zawk a, bat hmasak an thlang - an tifuh. Proteas tana ding chhuak hmasa ber De Kock chuan ball 140 lekah 174 ngawt a vaw chhuak nghal.

SA tan Reeza Hendricks (12 runs) leh Rassie van der Dussen (1) ten beisei phak lo mah se Aiden Markram (60) leh Heinrich Klaasen (90) ten De Kock an rawn pui ṭha viau a, over 50 a tlin meuh chuan run 382 ngawt siamin wicket nga chiah an hloh.

South Africa run siam zat enin Bangladesh tan a huphurhawm tih a lang a, Tigers tan hnehna chang tur chuan World Cup record siam a ngai! Cricket World Cup-a target um phak sang ber record chu tun World Cup-ah Pakistan-in an siam a, chu chu Sri Lanka laka run 345 an siam kha a ni.

Bangladesh-in record thar siam ngei tumin theihtawp an chhuah a, mahse, run 111 zet siamtu Mahmudullah-a'n puitu a nei ṭha lo a, Bangladesh an tlawm - batter dang zingah run 25 vaw kai pawh an awm lo!

Tigers hming lem an pek Bangladesh hi SA bowler ho hmaah chuan zawhte ang lek an ni a, over 46.6-ah run 233 chiah siamin an vaiin an out vek - kum 37 mi Mahmudullah hnathawhin a team a tiphur phak lo a ni ber.

South African bowler zingah Gerald Coetzee chu che ṭha ber niin, wicket thum a la a, run 62 chiah a pe - Marco Jansen, Lizaad Williams leh Kagiso Rabada ten wicket hnih ṭheuh an la bawk.