David Moyes hma hun a chiang lo!

Season hmasa lawka Europa Conference League-a West Ham champion puitu David Moyes hma hun a chiang lo a, khawthlang media ṭhenkhat chuan Scottish coach hian Hammers a chhuahsan dawn niin an sawi.

Kum 60 mi Moyes hian tun season tawp thleng cham turin West Ham-ah hian contract a nei a, thawk khat lai khan contract thar zawrh tumna awm mah se Hammers hotute lam hian an ngaihtuah ṭha mek nia sawi a ni.

Manchester United boss hlui Moyes pawh hian thutlukna siam zung zung a duh bik lo nia sawi a ni a, West Ham-a hna ṭha tak thawktu coach hian contract thar pe pawh ni se a lo ziak duh bik kher lo ve thei bawk.

Sulhnu

December 2019 khan Moyes hian Hammers hi a enkawl ṭan a, November 2018 - May 2018 inkara a lo enkawl tawh club hian thla 18 atan contract an pe. Hetihlai hian Hammers hi Premier League table-ah 17-na an ni a, tla thei dinhmunah an ding.

London club hian an coach langsar Manuel Pellegrini chu banin, Moyes-a lam hi an hawi. A tirah rinhlelh hlawh viau mah se table-ah 16-na ni chungin season a kharpui a, Premier League a inhamtanpui thei.

Moyes hian 2020-21 season-ah phei chuan parukna nihpuiin season an khar a, point 65 ngawt hmuhpuiin an club record a ni a, Europa League a hruai thleng. 2021-22 season-ah pasarihna an ni a, Europa League semifinal an lut bawk.

Moyesiah

Hammers fan-ten Moyes hi 'Moyesiah' tiin hminglem an pe hial a, an tan chhandamtu a ni - season hman zawh takah erawh table-ah 14-na an ni hram a, mahse, Europa Conference League-ah a champion pui miau a, sawisel a thiang lo.

Kum 43 hnua West Ham-in major tournament-a champion nomawi an chawi hmasak ber a ni a, a record hi a chhuanawm hle. Mahse, nipui lai khan transfer chungchangah director of football Tim Steidten nen an inhmu thiam lo nia sawi a ni.

West Ham hian bazar nan pound maktaduai 120 bawr vel an seng a, an player lei zingah midfielder Edson Alvarez leh James Ward-Prowse te tlangnel nghal viau mah se, defender Konstantinos Mavropanos leh forward Mohamed Kudus te erawhin beisei an la phak lo.

Tichuan...

Hammers hian tun season Premier League-ah match kua khelin vawi li an chak tawh a, vawi hnih draw neiin, vawi thum an tlawm - table-ah pakuana an ni mek a, an club sum dinhmun leh player thlirin, result pangngai tak niin a lang.

Mahse, Hammers hi an league match hnuhnung berah khan Aston Villa chuan 4-1 in an sawp a, hei hi club thuneitu sang ṭhenkhatin an hrethiam lo nia sawi a ni a, fans tam tak an la hmin zan lo niin an sawi bawk.

Europa League lamah erawh match hnih khel tawhin vawi hnih an chak a, zanin dar 10:15 hian Olympiakos chu khualmualah an lenchilh dawn - an chak a nih chuan knockout round an lut tiin a sawi ngam ang a, Moyes duh lotute pawh an inngaihtuah ṭha leh ang.