Vawiinah ADFA First Division Semifinal : BVT vs Bethlehem; Kanan vs Sihphir Venghlun

Aizawl DFA First Division inelna League Round chu Thawhlehni khan khelh zawh a ni a, ni hnih hnuah semifinal khelh a ni lehnghal dawn. Vawiin hian 1st Bn MAP Ground-ah final khel tur hi an zawng ang.

Chawhma dar 10:00-ah Bethlehem Derby hmuh tur a awm dawn a, league champion Bethlehem Vengthlang leh FC Bethlehem te an inkhel ang. Chhun dar 12:30-ah Kanan FC leh Sihphir Venghlun FC te an inkhel bawk ang.

Derby chu

League round-ah Bethlehem Vengthlang FC-in hneh loh an tawng lo a, an veng ṭhenawm FC Bethlehem pawh hi an hneh tawh. PC Malsawmsanga kaihhruai BVT hi team ṭha ber an ni lo a, team huaisen an ni thung.

A tawp thlengin BVT-in tha an thlah ngai lo a, kumina season duhawm tak an hman pawh hi ṭha taka khar an duh dawn. Bethlehem lakah BVT-in thapui an chhuah dawn a, inkhel hmuhnawm bik a ni ang.

Bethlehem hian coach Lalhriatpuia hnuaiah training ṭha tak an nei a, BVT hneh tawh lo mah se an chak lohna hi goal khat chauh a ni. FCB hi table-ah BVT hnuaiah an awm nachungin team ṭha zawkah an inngai a, hei tak hi a hmuhnawmna tur a ni.

Bethlehem leh BVT aṭangin 1st Bn MAP Ground a hnai a, entu pawh an tam turah a beisei theih ang.

Hmuhnawm dang

Season liam ta khan Kanan FC-in league round-ah an khingpui an hneh vek a, mahse semifinal-ah Mission Vengin an sawp. Tun season-ah Kanan pahnihna an ni a, an khingpui tur Sihphir Venghlun hi pathumna an ni.

League round-ah Sihphir Venghlun hian Kanan FC hi 4-2 in an hneh a, chutihrualin minute 85-na thleng Kanan hian 2-0 in hma an hruai tih hriat a ṭha. Chawngthansanga kaihhruai Kanan hi an thawkrim a, champion ngei an tum.

Sihphir Venghlun hian an thawkrim a ni tih khelmualah an lantir a, Bethlehem laka an chetsual hnuah an khingpui apiang an sawp ta emaw tih mai tur a ni. Kanan leh Sihphir Venghlun inkhel tur hi an intum tawk dawn a, a hmuhnawm tel bawk ang.