Satwik leh Chirag te an chak

Badminton mipa doubles champion Satwiksairaj Rankireddy leh Chirag Shetty te chuan French Open second round an lut a, hmeichhe singles player PV Sindhu pawh a match hmasa berah a chak bawk.

Asian Games gold medalist Satwik leh Chirag te hi kar hmasa khan Denmark Open aṭangin an inhnukdawk, tunah erawh harsatna nei loin French Open Super 750 badminton tournament an khel thei.

An match hmasa berah hian harsatna an tawk lo, world number 34 Lucas Corvee leh Ronan Labar te chu 21-13, 21-13 a hnehin first round an paltlang, hnehna chang tur hian minute 35 bak hun an mamawh lo.

Hmeichhe singles first round inkhelah PV Sindhu chuan duhthusama ṭhain bul a ṭan lo, game hmasa ber a hloh. Mahse, a khingpui Gregoria Mariska Tunjung chu 12-21, 21-18, 21-15 a hnehin second round a lut ta tho a ni.