Hammers-in Darren Randolph an la let

Premier League club West Ham chuan an goalkeeper hlui Darren Randolph chu Middlesbrough aṭangin pound maktaduai liin an lei a, kum thum leh a chanve chhung atan contract an ziahpui. Republic of Ireland international hian 2015-2017 chhung khan Hammers tan hian a lo khel tawh a, match 42-a khelhsak hnuah Boro hi pound maktaduai ngain a zawm. Mahse, Championship lama hun a hman hnuah London club-ah bawk a kir leh dawn ta a, kum 32 mi goalkeeper chuan, "He hmun lo kir tur hian ngaihtuahna ka seng tam lo, hnuchhawn mai atan chuan he sawmna hi a uiawm em a ni," tiin a sawi. 

Hammers hian an first choice goalkeeper Lukasz Fabianski chu hliam vangin hun engemaw chen an chhawr thei dawn lo a, Randolph lam hi an hawi ta a ni. Birmingham City tan pawha lo khel tawh goalkeeper hi November 24 hnuah khan malpui hliam vangin a inlan leh tawh lo a, Inrinni zan dar 8:30-a Everton an mikhual hunah a inlan theih an beisei.