FIFA president thar Gianni Infantino

Football khawvelin hruaitu thar a nei ta a, FIFA chuan Zir-tawpni zan khan an president thar ni turin Gianni Infantino an thlang tling.

FIFA president thar thlanna hi FIFA hnuaia ram 209 aṭangin ram 207-in an nei a, Kuwait leh Indonesia chu hrem mek an nih avangin vote hi an thlak ve thei lo a ni.

UEFA secretary general Infantino hian vote 115 a hmu a, amah hnaihtu ber vote 88 hmutu Sheikh Salman bin Ebrahim al-Khalifa aiin vote 27 laiin a hmu tam.

FIFA presidential candidate zinga nikum May thlaa Sepp Blatter nen an inkhin ṭuma thawm nei na tak Prince Ali bin al-Hussein erawh a thawm a na tawk ta lo a, vote li chiah a hmu. Hetihlai hian French pachal Jerome Champagne erawh vote hmu loin a nil thung.

Zurich khawpuia FIFA pre--sident thar thlannaah hian South African politician langsar Tokyo Sexwale chuan chuh ve tum mah se vote thlak a nih hma-in a inhnukdawk a, mi pali-in football khawvela hotu lu ber nih hi an inchuh.

Round one-ah tling nghal turin vote hmun thuma ṭhena hmun hnih neih a ngai a, Infantino hian heti zat a hmuh theih loh avangin round two neih ni mah se a vawi hnihnaah erawh round one-a vote thum leka amah phak lotu Sheikh Salman a hneh ta a ni.

Kum 1974 khan Brazil lam chhuak Joao Havelange chuan FIFA president ni tur hian English mi Stanley Rous chu round two-ah a lo hneh tawh a, hemi hnua round two thlen ngaih lehna hmasa ber chu Zirtawpni zan hi a ni.

Tu nge Infantino?

Kum 45-a upa Infantino hi Switzerland chhuak a ni a, FIFA president kal chhuak ta Sepp Blatter-a te khua Visp aṭanga mel ngaa hla Brig khaw chhuak niin dan hremi a ni.

University of Neuchate-a In-ternational Centre for Sports Studies-a secretary general pawh lo ni tawh hian kum 2000 khan UEFA chu dan hremi angin a zawm a, kum 15 hnuah FIFA pre-si-dent-ah hial a invawrh chho thei ta.

FIFA-in eiruk thubuai vang-a Sepp Blatter leh UEFA president Michel Platini-a hrem hnuah FIFA president dinhmun a chuh ve tur thu a puang a, kum 1998 hnua Blatter ni lo FIFA preisdent hmasa ber a ni dawn ta a ni.

Eng nge a sawi?

FIFA president thar Infan-tino chuan, "Football hi FIFA hnena hruai kir leh tur leh foot-ball hnena FIFA hruai kir leh turin ka theihtawp ka chhuah dawn a ni," tiin tun hnaia eiruk thubuai vanga hmingchhe tak FIFA chu siamṭhat a tum thu a sawi.

Kum 15 lek football khaw-vela a hun la hmang Infantino chuan sawi chhunzawmin, "Vawiina thil thleng hi eng nge a nih pawh ka hrethiam lo a, ka lung hi a chhe hial zawk a ni. Engkim hi a thar vek ang mai a la ni a, zinkawng thui leh hlimawm tak a ni a, eng chiah nge thleng tih hre tur hi chuan hun tam zawk ka la mamawh a ni," tiin FIFA president-a thlan a ni chu a lawm thu a sawi chhuak.

Infantino hmabak

UEFA boss Michel Platini-a'n FIFA president dinhmun a chuh theih tak loh avanga chuh ve chauh Infantino chuan eiruk thubuai vanga hmingchhia FIFA chu a then thianghlim tur thu sawi-in mitinin an zah tur pawl zah-awmah a siam leh tur thu a sawi.

Infantino chuan FIFA head-quarters-a FIFA member kal-khawmte hnenah, "In vaiin thawhpui turin ka sawm duh che u a, FIFA ropuina leh zah-awmna nei let leh turin kan thawhho a ngai a ni. Football hi kan ngaihtuahna luahtu ber ni leh se ka duh a ni," tiin FIFA hnuaia ram 209-te chu thawhpuiah a sawm.

UEFA secretary general kal chhuak tur chuan sawi chhunzawmin, "FIFA chuan hun harsa tak a paltlang a, buainain min chim a ni. Mahse, chung hunte chu tunah chuan a liam tawh. Tunah chuan insiamṭhatna lam kan buaipui a hun leh tawh a, rorelna ṭha leh langtlang kan din dawn a ni," a ti.

Infantino chuan sawi chhun-zawmin, "Vawiinah hian pawl zahawm tak kan ni leh a ngai a, chu kan zahawmna chu kan inpekna leh thawhrimna hmangin kan nei let leh tur a ni. He game ropui takah hian kan rilru kan pek theihna turin theihtawp kan chhuah a ngai a ni," tiin football chauh buaipui tura inbuatsaih a ṭul thu a sawi.

Eng nge an sawi?

English striker ropui chawl ta Gary Lineker chuan, "Infantino hian hnathawh tur tam tak a nei dawn a, mi dik leh rinawm niin ka hmu a, bawlhhlawh phiat fai turin hmunphiah ṭha tak pek a ngai ang," tiin thawhpuitu ṭha an pawimawh thu a sawi.

Portuguese legend Luis Figo chuan, "Tunah chuan inthlak danglamna chu a thleng ta, FIFA-a thil thar kan hmuh a hun ta," tiin beiseina a nei sang hle.

English Football Asso-ciation chairman Greg Dyke chuan, "Infantino hi mahni thu duh leh chapo a ni lo a, politician a ni lo bawk. FIFA hi mi chapo ten an kaihruai rei tawh lutuk a, Infantino hi chuan dik takin a hna a thawk ang," a ti.

Russian sports minister Vita-ly Mutko chuan, "A tir
aṭangin Infantino hi kan thlawp a, football khawvel hian a tak rama hnathawk tur Infantino ang hi a mamawh a ni," tiin a phur hle.

German football federation president Rainer Koch chuan Infantino-a'n hnehna a chan avanga an lawm thu a sawi a, UEFA executive committee member Karen Espelund chuan FIFA chuan mi dik leh rinawm a hmu ta niin a sawi bawk.

Hetihlai hian Infantino-a'n a hneh tak Sheikh Salman chuan Asian Football Confederation chuan FIFA nen thawhhona
ṭha tak an beisei thu sawiin football chu khawvel huap ni tura hmalak zel a nih a beisei thu a sawi bawk a ni.