Tuikual South-in Zarkawt BCA an hneh

Mizoram Super League in-khel a hmuhnawm zel a, Zir-tawp-ni zan khan Hawla Indoor Stadium, Republic Vengthlangah inkhel pahnih awmin season hmasa finalist Zarkawt BCA chu Tuikual South lakah an chak lo a, inkhel pakhat zawkah Mission Veng Vikings chuan Zarkawt Serpents an hneh bawk.

Team ṭha Tuikual

Tuikual South-in MSL2 ṭan hma-in champion an tum ngam thu an sawi a, an match hmasa berah Zarkawt BCA chu 78-73 in an hneh nghal a, player thar Lalmuanpuia Zote a che ṭha nghal hle. Point guard Mapuia Zote hian point 12 a score nghal a, captain F. Zodinthara chuan point 14 a thawh a, an langsar dun hle. Tukual South tana che ṭha ber erawh Armed Veng tlangval Vanchuangpuia (ChP-a) a ni a, point 17 a score bakah rebound vawi 14 a la bawk.

Marova Memorial Basketball Tournament champion BCA tan hian point guard Michael F. Lalawmpuia a khel ṭha a, point 18 ngawt score-in he in-khela thawhhlawk ber a ni a, mah se hun pawimawh quarter hnuhnung berah point hnih chiah a score theih avangin a team a chak pui zo lo. BCA tan Mathew Remtluanga Sailo-in point 14 neiin rebound vawi 15 a nei a, chak zo lo mah se MSL-a a bul
ṭan dan hi a duhawm hle.

Tuikual manager Lalrem-siama Hrahsel chuan, "Kan inbuatsaihna ṭhat kha a tawp lamah a rawn lang ta niin ka hria. Hnehna kan chan chhan chu veng mipui min ṭantute leh kan thawhrim vang a ni e. Kan beisei ang ngeiin fans kan nei ṭha a, veng pawn aṭang pawh in min ṭawiawmtu an awm khan kan lawmna a ti zual," tiin Vanglaini palai a hrilh. Tuikual hian tun kar Zirtawpni hian Chaltlang Ryders an hmachhawn leh ang.

Vikings an chak

MSL1-a palina dinhmun luahtu Mission Veng Vikings chu an match hmasa berah Zarkawt Serpents lakah an chak lo zawk dawn emaw tih hnuah quarter hnuhnung berah an lehthal a, 67-61 in an hnehna an chang. Season hmasa khan Vikings leh Serpents te hi vawi hnih an inkhelhah vawi khat ve ve hnehna an chang a, season tawpah Vikings hi table-ah a chung zawkah an awm.

Tun season-ah erawh vawi khat ṭheuh an inkhelh kual hnuah a sang paliin semifinal an khelh dawn avangin Vikings tan an tiatpui laka hnehna chan hi a lawmawm dan a zual ang. Mission Veng Vikings hian an match lehpekah chuan Zarkawt BCA an hmachhawn leh ang.

Vikings manager H. Lalhruai-tluanga chuan, "MSL2-a kan match hmasa ber a nih avangin player-ten a tir lamah an khel fuh lo deuh a, a tawpah erawh kan ṭhat dan takin kan khel thei a, hnehna kan chang kha kan vannei vang a ni. Min ṭantute chungah lawmthu ka sawi a, a thlawna bus min hmantirtu Jeffrey L Fanai chungah kan lawm tak zet. Kan inkhelh hmabakah team
ṭha BCA kan tum chhunzawm dawn avangin ngawrh takin kan inbuatsaih chhunzawm ang," tiin Vanglaini palai a hrilh.