Madrid Derby-ah Atletico an chungnung zawk

Real Madrid tan La Liga nomawi beisei a harsa tawh dawn - Inrinni zan khan Madrid derby-ah an mikhual Atletico Madrid chu 1-0 in an hneh lo a, nizana inkhel hmahruaitu Barcelona an phak lohna chu point kua lai a ni ta. Catalan club result a zirin an inthlauhna hi a la danglam leh thei ang.

Atletico Madrid tan Antoine Griezmann chuan he inkhela goal awmchhun hi minute 53-naa Filipe Luis ball siamsak aṭanga a khung a ni a, La Liga chanchina league match thum chhung a zawna Santiago Bernabeu-a chak thei hmasa ber an ni.

Zinedine Zidane-a'n Real Ma-drid manager a nih hnua a Champions League match hmasa berah chak result hlawh chhuak mah se Madrid Derby-a hmachhawn hmasak berah erawh a chak zo ta lo a, French legend kaihhruaina hnuaia Real an tlawm hmasak ber niin result vanga lungawi lo Real fan-te chuan club president Florentino Perez chu bang turin an au nawmnah hial.

Ronaldo a lungawi lo

Barcelona khelh dan enin Real tan La Liga nomawi bei-sei chi a ni tawh lo a, mimal chawi-mawina a dawn hnem ngaihtuaha Real-a nomawi chawi hnem lo Cristiano Ronaldo a lungawi lo.

Real thiampuipa chuan a team mate-te chu amah ang veka thiam ni se chuan tun aia an thlen san zawk tur thu a sawi! Real hian Atletico nen an inhmachhawnna inkhelah hliam vangin Gareth Bale leh Marcelo-te an chhawr thei lo a, Karim Benzema chu second half-ah lakchhuah a ni bawk.

Ronaldo chuan, "Midang ka zah lohna niloin player ṭha khel tur in kianga an awm loh chuan a buaithlak. Lucas Vazquez, Jese leh Mateo Kovacic-te hi player ṭha an ni lo ka ti lo a, mah se Karim, Bale leh Mar-celo-te nena khelh ho nen chuan a in ang lo a ni," a ti.

Mahse, rei lo teah Ro-nal-do-a'n a thusawi a pha leh nghal a, Portugal captain chuan, "Player ṭha ber ka ni ka tihna a ni lo a, ka fitness chungchang ka sawina a ni. Ka team-mate te aia ka ṭhat bikna a awm lo," tiin a insawifiah.

Kum 31-a upa forward chuan amah sawiseltu media-te kap letin, "Media-te thusawi hian minti buai ve lo a, ka ngaihtuah lo. Ka record, statistic leh number-te hi en ula dawt in hmu lo ang," tiin ṭha a inti tawk hle.

Zidane-a thukhawchang

Real manager Zidane chuan, "Madrid Derby khel tur hian kan la inringtawk lo a, kan fitness ringawt pawh a ni lo. Ka player-te an in fit tawk a, kan inbuatsaih angin kan khel chhuak lo zawk a ni," tiin Ronaldo-a'n amah anga player dang in fit ve lo anga a sawi chu a zawm lo.

French legend chuan sawi chhun-zawmin, "Atletico hian keini aiin game an khel hnu-hnung zawk a, insiamṭhatna hun an nei tlem zawk. Chuti chung chuan an khel ṭha a, a awmzia chu rilruah kan phak lo tihna a ni," tiin Atletico player-te chu an huaisen thu a sawi.

Zidane chuan beidawng thei an la nih loh thu sawiin, "Ka player-te hnenah hmalam pana kan kal zel a pawimawh thu ka hrilh a, zanina kan khelh danah lawmna tur awm lo mah se beidawng thei kan la ni lo," tiin a player-te chu beidawng mai lo turin a fuih.