AC Milan an kal zel

Inrinni zan Italian Serie A inkhelah AC Milan chuan an mi-khual Torino lakah si khat faiin hnehna an chang a, season thara Cham-pions League khelh an beisei-na chu an la chhawm nung ve zel.

San Siro-a inkhelah mualneitu lam tan Luca Antonelli chuan first half-ah he inkhela goal awmchhun hi a khung. Italy left back tan tun season-a a goal hnihna chauh ni mah se a team tan point thum a hlawhchhuah sak. Milan hian tun hnai an league game hnuhnung pakuaah goal an khung vek a, Serie A-ah goal khung zawn rei record nei ṭha ber an ni mek a ni.

AC Milan coach Sinisa Mihaj-lovic chuan, "Ka nauten hnehna chan phu khawpin an khel a, kan duh leh mamawh zat point kan hmu e. March thla chhung hian Sassuolo, Chievo leh Lazio te kan hmachhawn leh dawn a, inkhel hautak a ni dawn. Kan game khelh hmabak pathum hian a sang pathum zinga kan tel dawn leh dawn loh a hril thui hle ang," tiin a sawi.

Tun dinhmunah Milan hian league match 27 khelh tawh
aṭangin point 47 an hlawh chhuak tawh a, table-a pathumna AS Roma chu point sarihin an phak lo mek.

Roma tan Shaarawy

January transfer inhawn lai khan Roma chuan Milan aṭangin Stephan El Shaarawy chu loan-in an hawh a, an ti sual lo. Italian forward hian Empoli lakah goal hnih khungin a team chu Serie A Table-ah pathumna dinhmun a luah pui.

Kum 23-a upa Shaarawy hian season chawhma lam kha chu French Ligue 1 club AS Monaco tan a lo khel bawk. Empoli khelmualah hian Shaarawy bakah Miralem Pjanic chuan goal khat a khung a, Ervin Zukanovic chuan an lamah a ti lut palh thung.

Roma hian point 53 hmuin hmahruaitu Juventus chu point ngain an phak lo mek a, mahse Pathianni zana Juve inkhel result a zirin an inthlauhna hi a danglam leh thei ang.