Vawiinah 2014 Santosh Trophy Final Rematch

Santosh Trophy vawi 70-na chu vawiin hian Nagpur-ah khelh ṭan a ni dawn a, Mizoramin vawiin tlai dar 3:30 hian Nagpur University Stadium-ah 2014 final-a an lo hneh tawh Railways an hmachhawn ang.

Vawiin vek hian SEC Railway Stadium-ah Jammu & Kashmir leh inelna thlengtu Maharashtra te an khel ang a, Group A-ah champion lai Services an awl thung.

Head to Head

Kum 2000 leh 2001 khan Mizo-ram leh Railways hi qua-li-fying round-ah cluster khatah dah an ni a, Mizoram an inlan lo. Kum 2008-ah cluster khatah awm lehin 1-1 in an inhnehtawk a, goal difference nei ṭha zawk Railways-in final round an lut.

Kum 2010-ah Mizoram leh Railways hi cluster khatah dah leh an ni a, match hmasa bera Orissa an hneh loh vangin Mizoram tan match hnuhnung berah Railways hneh ngei ngei a ṭul. Mizoram tan Lalrinfela'n goal awm chhun a khung a, Railways laka 1-0 a hnehna changin qualifier an paltlang. Mizoram hian pre quarterfinal-ah Kerala hneh zuiin a vawi khat nan quarterfinal an lut bawk.

Kum 2012-ah Mizoramin a vawi hnih nan quarterfinal an lut a, amaherawhchu hemi kum quarterfinal hi chu a danglam a, team 16 zet an la dam. Mizoram hi Group D-ah Tamil Nadu, Railways leh Delhi-te nen awm-in match hmasa berah Railways nen hian 2-2 in an inhnehtawk.

Kum 2014 final-ah Mizo-ramin Railways an tawng a, Zico Zoremsanga goal hnih leh F. Lalrinpuia-te goal hmangin 3-0 in hnehna an chang a, a vawi khat nan an champion.

Nikum khan final round group stage an awm dun a, H. Lalmuankima goal hmangin Mizoram hi 1-0 in an chak a, group hmahruaitu ni chungin semifinal an lut a, Punjab hneh loin final an lut zo lo.

Mizoram-in Railways an hmachhawn hnuhnung pangaah chak loh an nei lo a, vawi thum zet chakin vawi hnih an inhnehtawk. An intum tawhna thlir let chuan Mizoram hi team ṭha zawk an ni.

Nikum leh vawiin

Mizoram leh Railways in-hmachhawn hnuhnun ber ṭum kha March 9, 2015 a ni a, ni 359 ral hnua an intawn leh meuh chuan Lalrinchhana Tochhawng, V. Lalṭanpuia leh Joseph Lal-nunpuia-te chiah khel nawn thei dinhmunah an ding.

Nikuma midfielder pawi-mawh Samson Ramengmawia chu tun ṭumah hian NE Zone qualifier-ah assistant coach a ni a, final round-ah erawh a zin lo.

Goal khungtu MK-a chu Mualpuia I League match hnuhnung bera hero of the match-a thlan a nih hnuin Aizawl FC tan Bengaluru FC leh Mumbai FC-te hmachhawn turin a fehchhuak. Tun ṭum Santosh Trophy-a Mizoram team hi nikum nena khaikhin chuan team thar hlakah a ngaih theih.

Zara leh Hluna

Qualifier-a Mizoram mana-ger Lalbiakzuala chu hna lama a buai avangin final round-ah T. Vanlalhluna'n manager hna hi a chelh thung ang. Mizoram coach HC Zarzoliana leh Hluna te hi hun rei tak an lo inkawp tawh a, kum 2003 khan Hluna enkawlna hnuaiah Zara hian player angin Dinthar tan a lo khel tawh.

Coach leh player anga an thawhho hnuah Zara'n coaching career a ṭan a, NIS a zawh hnuin Dinthar FC-ah coach angin a lut a, veteran coach Hluna nen hian thawk dun nghalin MPL ṭan hma season khan Dinthar chu First Division League-ah an champion pui nghal a, MPL hmasa berah an champion bawk.

Kum 2012 khan Hluna leh Zara hian Mizoram team an lo enkawl tawh a, hemi
ṭum hian Sikkim-a khelh Dr TAo Football-a an champion bakah Aizawla neih North East Games-ah an champion bawk.

Mizoram manager T. Van-lalhluna chuan, "Nagpur kan kalkawngah beisei angin kan tluang tawk lo a, chuti chung chuan player-ah phunnawi an awm lo. Team kan inlungrual a, training pawh kan nei ṭha a, Railways lakah hian Mizoram team an la tlawm ngai loh avangin kan chak ngei pawh kan ring," tiin a inrintawk thu a sawi.

Mizoram team hi National Council of Churches in India (NCCI), Hostel-ah an thleng a, Mizoram manager hian Nagpur Mizote hnen aṭanga ṭawiawmna an hmuh ṭhat avanga a lawm thu Vanglaini palai a hrilh bawk.

Mizoram coach HC Zar-zo-liana chuan, "Goal-keeper bik-ah chuan starting eleven chang tur ka sawi lawk thei lo a, player dang chu Manipur hmachhawnte tho kha an ni ang. Tun ṭum-ah hian Muanpuia a zin theih loh avangin a aiah Joseph-a'n midfield-ah bul a
ṭan ang. Chak zawk tur chu sawi lawk theih a ni lo a, a vannei zawkah kan ṭan ngei ka ring," tiin Vanglaini palai a hrilh.

Final round khel tur Mizo-ram team-ah hian F. Lalmuanpuia leh Malsawma Chhangte-te an zin tel ve lo.

Railways lam ve thung

Kum 2014 khan Lam-mualah Railways an rawn inkhel tawh a, team ṭha an ni.

Hriat theih chinah 2014 finalist team aṭangin Santosh Trophy top scorer lo ni tawh PC Riju, Anil Kisku, Kenistan leh midfielder ṭha Dipankar Das te an la kawl.

Hna nghet neia football khelte vanglai a rei loh ṭhin avangin team ṭha reng tur chuan recruitment neih ve reng a pawi-mawh a, MPL hnuhnung bera Mizoram Police relegate chhan bul ui ber pawh tun hnaia player recruitment an neih loh vang a ni. Amaherawhchu Railways erawhin player an la la lut reng a, Tamil Nadu midfielder L. Charles Anandaraj-a'n a vanglai a hmang chho ang.

2014 semifinal-a Mizoramin extra time-a Tamil Nadu an hneh ṭum khan Charles hi player pawimawh a ni a, nikum khan Railways tan khel
ṭanin final round kalkawngah goal a khung nghe nghe.

Railways hian final round lut turin Chhatisgarh leh Bihar-te an hneh a, an match hnuhnung berah Jharkhand nen goal awm loin an inhnehtawk. Tun ṭumah hian champion ngei tumin an chhuak a, February 22-a Mizoramin qualifier-a Manipur an hneh ni khan Nagpur hi an thleng tawh - Mizoram tan vanduai theihna tur team an ni.