Everton-ah neitu thar

Iranian sumdawng hausa Farhad Moshiri chuan Everton-ah neitu nihna 49.9% a lei. Kum 60-a upa Moshiri hian Everton-a share a neih theihna tur hian Arsenal lama a share neih chu Gunners-a a thawhpui zinga mi Alisher Usma-nov hnenah a hralh a ni.

Moshiri hian Arse-nal-a 15% share a neih chu Alisher Usmanov hnenah hian pound maktaduai 200-in a hralh a, Goodison Park-ah player ṭha zawk an lakluh tur thu a puang nghal bawk.

Everton chairman Bill Kenwright chuan, "Theihtawp chhuaha kan club-a share lei ngam tur kan zawn hnuah he club hmasawn pui theitu tur neitu thar kan nei ta niin ka hria," tiin Moshiri-a'n an club-a share a lei chu a lawm hle.

Kenwright hian December 26, 1999 khan Peter Johnson hnen aṭangin Merseyside club hi pound maktaduai 20-in a lo lei tawh a, November 2007 khan Everton hralh a duh thu hi lo sawi tawhin dawrtu eng emaw zat a nei hman a ni.

France rama mi hausa fuankhawmna Monaco-a khawsa mek Moshiri hian steel leh energy sumdawnna company hrang hrang Britain leh Russia ramahte share a nei a, a mimal hausakna hi pound tluklehdingawn 1.3 vel niin Forbes chuan an chhut sak.