Bagan leh Jeje an kal zel

Inrinni zanah Mohun Bagan-in Jeje Lalpekhlua goal hmahruai leh Cornell Glen-a goal hnih hmangin Salgaocar 3-1 in an hneh a, inkhel dangah Mumbai FC leh Sporting Clube de Goa te 2-2 in an inhneh-tawk bawk.

I League match kua khelh tawh aṭangin Ma-riners-in point 21 hmuin league hmahruaitu an ni a, Salgaocar erawhin point nga chauh an la hmuh avangin table mawngphahah an awm.

Jeje leh goal

Tilak Maidan Sta-dium-ah Mizo tlangvalin bul a ṭan ṭha a, minute hnihna lekah Jeje through ball ṭha tak chu Cornell Glen-a'n goal-ah a chantir thei lo. Trinidadian stri-ker-in goal a khung loh aṭanga minute 11-naah Lenny Rodrigues ball pet chu Sporting keeper Karanjit Singh-a'n dang mah se a per chu Jeje-a'n a pet goal chiang hle.

Mariners-in khual-mualah inkhel an thunun a, Jeje leh Japanese mid-fielder Yusa Katsumi te an langsar dun hle. Mumbai boss Santosh Kashyap-a'n minute 20-na lekah Jackichand Singh luhtir mah se Kolkata club tan Glen-a'n goal hnih dang a khung belh a, halftime a nih meuh chuan chak tur a chiangah a ngaih theih tawh.

Second half minute 73-naah Darryl Duffy-a'n Salgaocar tan goal khat a khung a, mualneitu phur sawt mah se Bagan boss Sanjoy Sen-a'n defensive midfielder Bikramjit Singh a luhtir a, Goan club-in goal dang an khung belh tawh lo.

Hnahthial tlangval Jeje hian tun season I League-ah goal thum a khung tawh a, Indian zinga goal thum khung thei chu CK Vineeth, Sunil Chhetri (Bengaluru), Bikash Jairu (East Bengal) leh Sushil Kumar Singh (Mumbai FC) te chiah an awm a, goal thum aia khung tam an la awm lo. Inelna pum-puiah erawh Scottish striker Duffy-a'n goal 9 a khung tawh a top scorer a ni mek.

Mariners striker Jeje hian I League-a goal thum a khung bakah hian AFC champions League qualifier-ah goal khat a khung a, AFC Cup-ah goal hnih a khung tawh bawk.

Relegation Battle

Mumbai leh Sporting Goa te season liamtaah vawi hnih an inhnehtawk a, Goan club hian an mualah Mumbai FC hi an hneh a, Mumbai FC lamin an mualah an hneh ve thei lo.

Inrinni zan khan Coo-perage Ground-ah Sporting Goa-in Mah-moud Al Amnah hmangin minute 7-na lekah hma an hruai a, Mumbai FC-in Japanese forward Ryuki Kozawa hmangin an sut. First half tawp hma hretin Mumbai FC midfielder N.P.Pradeep chu hnawhchhuah a ni.

Player 10-a khel chungin mualneitu lamin second half-ah Jayesh Rane hmangin minute 53-naah hma an hruai a, Victorino Fernandes hmangin Sporting Goa-in minute ruk hnuah an sut a, goal dang a luh belh lo.

Mumbai FC-in point 10 hmuin nizan inkhel chhiar tel loin paruknaah an awm a, relegation battle-ah point 12 hmu Sporting Goa nen an tel. Dinhmun chhe ber erawh Mohun Bagan hneh lotu Salgaocar an ni a, Aizawl FC an bang bik lo. Nilani zan hian Aizawl FC leh Mumbai FC te Cooperage Ground-ah an inkhel dawn a, an point hmuh tawh dan thlirin inkhel pawimawh tak a ni.