Leicester-in hma an hruai zel

Premier League hmahruaitu Leicester City vanneihna a kal-tluang zel - Inrinni zan khan Norwich City nen an inhnehtawk tawh dawn emaw tih hnuah Leonardo Ulloa goal hmangin 1-0 in an chak a, Premier League hmahruaitu an ni chhunzawm zel.

Leicester khelmuala inkhelah hian mualneitu team-in goal an khung thei lawk lo a, mikhual team Norwich City an hlauhawm zawk.

Canaries (Norwich sawina) tana an hun ṭha neih chu Cameron Jerome leh Nathan Redmond-te'n goal-ah an chantir thei lo a, substitute Ulloa-a'n Norwich a hrem. Argentine striker hian minute 89-naah Marc Albrighton ball cross chu goal-ah a chantir a ni.

Champion zia

Norwich manager Alex Neil-a'n an club dinhmun a hrechiang a, King Power Stadium-a inkhel-ah defensive game a khel.

An game plan-ah Norwich an hlawhtling a, Jamie Vardy-an ven hneh avangin English striker hi hlauhawm lo tluan chhuak zak a, Riyad Mahrez-a'n hmun awl a nei hleithei meuh lo bawk.

Mahse khelh ṭhat loh ni pawha chak result hlawhchhuah hi champion zia a nih chuan Leicester City hi Premier League nomawi chawi thei zing aṭanga thaibo a thiang tawh lo.

Ranieri thukhawchang

Leicester manager Claudio Ranieri chuan, "Game harsa tak a ni. Norwich khan an khel ṭhain hmun awl min siam meuh lo a, mah se a tawp thlengin kan bei a ni. Arsenal laka kan tlawm hnuah kan chak leh thei a, hei hi bul kan ṭan ṭhatna tur chu a ni," a ti.

Italian manager chuan sawi chhunzawmin, "Kan inkhel aṭanga ka zir chhuah chu ka player-te hian a tawp thlengin inrintawkna an nei hi a ni. Ka tan chuan chu aia pawimawh chu a awm chuang lo. Kan tan chuan kan inkhel leh tur apiang hi final match-a ni a, chutiang chu kan rilru puthmang a ni," tiin a naute an huaisen thu a sawi.

Hammers an kal zel

West Ham-in an manager hlui Sam Allardyce-a team Sun-derland an mikhualna inkhelah ṭhat an chhuah duh lo a, tlak hlauhawm dinhmuna ding mek Black Cats hi Michail Antonio goal hmangin 1-0 in an hneh.

Hammers tan an khelmuala match 13 chhung tlawm hmel hmu loa an kaltluanna a ni ta a, Black Cats erawh table-ah 19-na luah mekin an dinhmun a duhawm lo hle.

Premier League mawngphah team zingah Sunderland aiin Aston Villa dinhmun a duhawm lo lehzual a, an mikhualna ramah Stoke City chu 2-0 in an hneh lo.

Potters goal hnih hi Marko Arnautovic khung niin table mawngphah luahtu Villa hian an chung chiaha awm Sunderland an phak lohna hi point sarih lai a ni tawh.

West Brom chak

Baggies-in an mikhual Crsytal Palace chu 3-2 in an hneh a, mualneitu team tan Craig Gardner, Craig Dawson leh Saido Berahino-te'n goal khat
ṭheuh an khung a, Crystal Palace tan Connor Wickham-a goal hnih khungin awmzia a nei thui lo.

Inrinni zan inkhel dangah Pre-mier League kaithar pahnih Watford leh Bournemouth-te chu goal khung loin an inhnehtawk bawk.