National Games gold medal latu Mizo tlangval Lalhunthara

India ram state leh union territory hrang hrangte inelna - National Games neih laia weightlifting huangah Lalhunthara chuan gold medal a chawi chhuak. Mizoram weightlifting tan chuan national games bika pakhatna dinhmun a luah vawi khatna a ni hial!

Panaji, Goa-a inelna neihah Lalhunthara hi 67kg huangah a khel a, lei aṭanga chawi char nghal 'snatch' bikah 122kg a chawi, hemi bikah hian SSCB aiawhtu Subash Lahre (124kg) a tluk lo a, Arunachal Pradesh mi Markio Tario nen an inzat.

Lei aṭanga chawi kan a, awma dah hnua char leh 'clean & jerk' neih chhunzawm niin, hemi huangah hian Mizo tlangval hian 159kg chhawiin a chungnung ber a, amah hnaihtu pahnih Lahre leh Bengia Tani te chuan 156kg ve ve an chawi.

Weightlifting dan angin snatch leh clean & jerk huanga an chawite hi belhkhawm a ni - Lalhunthara chu chungnung berin 281kg a chawi a, a hnuaiah hian Lahre-a (280kg) awmin Mizo weightlifter a phak lohna hi 1kg chauh a ni.

National Games bikah hian Mizo weightlifter pathumin medal an la tawh. Kum 2015 khan Lalchhanhimi'n silver medal lain, nikum khan Zakhuma'n bronze medal a la a, kuminah Lalhunthara a rawn inlar leh ta chiah.

TNT chhuak

Thutak Nunpuitu Team (TNT) dintu Dr. Sangthankima hmalaknain kum 2002 khan TNT, Muanna Vengah volleyball, judo leh weightlifting te hi mumal taka training a ni a, inzir zingah hian Lalhunthara pawh a tel.

Hunthara hian kum 2005 aṭangin TNT-ah hian weightlifting a zir ṭan, kum 2016 aṭang khan Army Sports Institute (ASI), Pune-ah a inzir chhunzawm - he hmunah hian tun thlengin a la inzir chhunzawm zel a, tunah hlawhtlinna a chang.

Hlawhtlinna a channa kalkawngah hian coach hrang hrang Malsawma Khiangte (SYS coach), Goldenthanga (NIS coach) leh K. Zonunsanga (NIS) te hnuaiah training a nei tawh a, tunah huan Zonunsanga'n a enkawl mek a ni.

Lalhunthara hian nikum khan National Junior Championship-ah gold medal a la tawh bawk. TNT hotupa Sangthankima'n a tira a beisei ang ngeiin TNT naupang chhuak Lalzuidika (56kg) pawhin Commonwealth Youth-ah silver medal a lo la tawh bawk.

MOA an lawm

Mizoram Olympic Association (MOA) hruaitute chuan Mizoramin National Games neih laia gold medal an la chu an lawm thu an sawi a, inelna neih mekah medal dang pawh lak belh an beisei thu Vanglaini an hrilh - Lalhunthara hi nimin khan Rs 10,000 an pe nghal.

Mizoram hi infiamna peng hrang 10-ah an inlan dawn a, infiammi 26 tlingin weightlifting bakah hian - boxing, judo, sepaktakraw, shooting, swimming, taekwondo, wrestling leh wushu huangahte inelna an la hmachhawn chhunzawm ang.

Vawiin hian Lalrina Renthlei chuan snooker a khel dawn. Tuikhuahtlang tlangval Lalrina hi Mizoram bakah India huap pawha medal hrang hrang lo hlawh chhuak tawh niin, snooker-ah hian manager T. Lalṭanpuia nen an kal.

Nikum khan Gujarat-ah National Games hi neih a ni a, Mizoram hi football, boxing, judo, weightlifting, swimming leh wushu huangah te inlanin gold medal leh silver pakhat ve ve bakah bronze medal pahnih an la.