Barcelona-in Shakhtar an ngam

Champions League match thum an khelh tawhah Barcelona an la chak vek - Nilaini zan khan an mikhual Shakhtar Donetsk chu 2-1 in an hneh a, Catalan club tan round of 16 lut turin hnathawh tur a tam tawh lo.

Barcelona tan Ferran Torres chuan minute 28-na lekah goal hmahruai a khung a, rawlthar duhawm Fermin Lopez-a post pet per, a per lehlam chu Manchester City forward hlui hian goal-ah a chantir.

Minute riat a liam a, Torres hian goal a khung theih nana puitu Lopez a pui let a, minute 36-naah kum 20 mi midfielder hian an goal hnihna a khung - Torres-a siamsak a ni.

Ukrainian club tan Heorhii Sudakov chuan second half-ah si phurh a sut ṭhen a, mahse, hun tawp thlenga Barca ṭang tlangin hnehna an chang - match thum aṭangin point kua an nei ta.

Champions League-a vawi nga champion tawh Barca hian kum 2015 hnuah khan European football-a club inelna sang ber nomawi hi an la chawi leh lo a, an hmelma Real Madrid hlawhtlinna chu hrehawm ti takin an thlir reng - kuminah hnehna hlado chham an duh.

Sum harsatna aṭanga talchhuah tuma bei mek Barca tana chanchin lawmawm chu rawlthar duhawm an chhuak thar zel hi a ni. An goal hnihna khungtu Lopez hi kum 20 mi chauh la niin, an academy chhuak a ni a, August 27-a club tana a match hmasa ber khel ve chauhtu hi a rintlakzia hmuh turin a awm fo.

Second half-ah Lopez hian goal khung theihna dang remchang a nei a, mahse, woodwork a tihper bakah a goal khung pakhat zawk chu pawmsak a ni lo - a che vel a hmuhnawm ṭhin hle.

Catalan club tan hian kum 16 mi Lamine Yamal chuan a vawi hnih nan Champions League match-ah bul a ṭan a, Athletic Bilbao laka Barca tana a match hmasa ber khel a, goal khungtu, kum 17 mi Marc Guiu pawh bench aṭangin luhtir a ni.

Barca hian Pedri leh Gavi an nei sa bawk a, Spanish champion hian sum hman thiam loh avangin harsatna tawk mah se an academy hmingthang 'La Masia' hmanga chhawk zangkhaiin an awm mek a, Catalan club an tho leh ṭan mek.

Hetihlai hian Barca hian chanchin lawmawm lo hriat tur erawh an nei tho. Minute 74-naah hliam vangin Joao Felix chu lakchhuah a ngai a, striker chhuanvawr Robert Lewandowski chu hliam vangin a chawl mek bawk - Inrinni zanah Catalan club hian El Clasico khel turin Real Madrid an mikhual dawn!