Thla 10 chhung inkhel lo tur Tonali

Italian Football Federation (FIGC) chuan Newcastle United midfielder Sandro Tonali chu inthapna lama a lo inhman avangin thla 10 chhung inkhel thei lo turin an hrem a, tun season-ah Italian midfielder hi kan hmu tawh dawn lo tihna a ni.

Tonali hian July thla khan AC Milan aṭangin Newcastle hi pound maktaduai 55-in a zawm a, Magpies tihmuhnawmtu zingah a tel phak - mahse, tun hnaiah football lama sum inthapna lamah a inhmang ṭhin tih hmuhchhuah a ni a, dan phal loh a nih avangin hrem a ni ta a ni.

Kum 23 mi Tonali hian FIGC nen an inbiakrem angin thla riat chhung chu, sum inthapna lama inhmang nasate inenkawlna hmun chu inenkawl turin a pan ṭhin dawn a, a tawnhriatte midang puih nan a hmang bawk ang.

Tonali hi a nihna takah chuan kum thum ngawt inkhel thei loa hrem theih tur a ni a, mahse, ṭha taka Italian football thuneitute leh dan hremi te a thawhpui avangin thla 10-ah tihtlemsak a ni ta zawk a ni.

Tun thlatir khan Juventus midfielder Nicolo Fagioli chu hetiang thubuai avang tho hian thla sarih atan hrem a lo ni tawh a, October 12 khan Tonali hi Italy camp aṭangin Nicolò Zaniolo nen an thubuai avang hian thawn haw an lo ni tawh.

Nilaini zan Champions League-a Borussia Dortmund an hneh loh ṭum pawha inlan Tonali hi €20,000 (Rs. 17,54,900) chawi tura tih a ni bawk a, hetihrual hian Newcastle tana friendly match a khelh leh a training phalsak a ni bawk.

Thla 10 hrem a nih chhung hian Euro 2024 khelh a ni dawn bawk a, European football-a ram inelna sang ber khel turin Italy hi tling pawh ni se, Tonali chu a inlan ve thei dawn lo tihna a ni.