UCL group F a ngaihnawm Paris Saint Germain leh Dortmund an chak

Champions League khel tur pawh a nih khan - Paris Saint Germain, AC Milan, Newcastle United leh Borussia Dortmund te awmna group F hian ngaihven a hlawh, rinlawk a nih ang ngeiin last 16 lut tur pawh hriatthiam a harsa hle - a hniam ber thlengin an la tling thei.

Nilaini zan inkhelah PSG hian Kylian Mabappe hoin an mikhual AC Milan chu 3-0 in an lo hneh a, inkhel dangah Newcastle United chuan an mikhual Borussia Dortmund chu 1-0 in an ngam lo thung.

PSG an chak

Luis Enrique enkawl PSG hian beisei anga ṭhain season bul an ṭan lo, chetsual zauh an ching - an inkhel a nghet ṭha tawk lo bawk. AC Milan lakah erawh a tir aṭanga a tawp thlengin team ṭha an nihzia an lantir thei a ni.

Paris khawpuia inkhelah Mbappe a hmuhnawm. France captain hian a hun ṭha hmasa goal chhungah pet lo mah se, minute 32-naah box chhungah ball tlan luh puiin amah vengtu defender leh goalkeeper Mike Maignan te rin loh lam kilah a khung.

Second half pawh mualneitu PSG lam chan tho a ni. Ousmane Dembele-a'n goal mawi a khung a, mahse goal luh hmain midfielder Manuel Ugarte a lo foul avangin VAR hman a nih hnuah an goal khung hi an hnawlsak.

Ligue 1 champion dan reng theih an ni chuang lo - Barcelona forward hlui Dembele bawk a hlauhawm, a goal shot ṭha zet chu lo dansak mah se ball per hi Randal Kolo Muani chuan hnai tak aṭangin a khung a, hun tawp dawnah Lee Kang-in chuan chak a nemnghet.

Enrique thukhawchang

PSG manager Luis Enrique chuan, "A nihna takah chuan a tir lam minute 25 thleng kha chuan kan khel ṭha tawk lo, kan inrintawk loh avangin tihsual pawh kan nei nual. Mahse Kylian-a goal kan hmuh hnuah kha chuan thil engkim a danglam.

"Hetiang inkhel boruak sangah hi chuan match pumpui thunun theih a ni lo a, chutiang tura inbeisei chi pawh a ni lo. Chutihrualin a tir aṭanga a tawp thlengin theihtawp kan chhuah a, fans thlawpna kan dawng ṭhain kan phu ang ngeiin point thum kan hmu," a ti.

Spanish manager hian Parc des Princes boruak a nuam tih a sawi tel a, match an khelh hmabakah pawh fans lam aṭanga thlawpna ṭha an mamawh tih a sawi bawk - an tum ber chu Champions League nomawi chawi a ni ang.

Enrique enkawlna hnuaiah PSG hian ball an chang tam ṭhin a, forward Mbappe pawhin kum dang ang bawkin goal a khung tam leh dawn niin a lang. Tun season kal laiah club leh ram tan match 13 aṭangin goal 13 a khung leh tawh.