World Cup century rang ber siamtu Maxwell

Australian all rounder langsar Glenn Maxwell chuan World Cup chanchina 100 siam rang ber record a siam a, Netherlands lakah Australia chu run 309 zetin hnehna a chanpui.

Kum 35 mi Maxwell hian run 100 siam turin ball 40 lek a mamawh a, ball 49-a run 100 siamtu Aiden Markram record a khum - South Africa batter Markram hian ni 18 liam ta lawk khan Sri Lanka lakah record a siam a, tunah Maxwell-a'n a rawn khum lehnghal!

Arun Jaitley Stadium, Delhi khawpuia inkhelah ṭhumvawra vannei zawk Australia-in bat hmasak an thlang a, over 50-ah run 399 siamin wicket riat chiah an hloh a, run 106 siamtu Maxwell bakah David Warner (104 runs) chuan century a siam bawk.

Anni bakah hian Steven Smith (71) leh Marnus Labuschagne (62) ten run pangngai tak an rawn siam bawk a, Australia an che ṭha takzet - Netherlands bat hun a thleng a, run 100 an siam tling lo!

Kar hmasa lawka South Africa barakhaihtu Netherlands hian over 21-ah run 90 tlinin wicket an hloh vek a, run siam hnem ber Vikram Singh chuan run 25 a tlin hram - Australia tan Adam Zampa chuan over thum a vawmah run riat lek pein, wicket li a la.

Hetihlai hian Netherlands lamin record duhawm lo an siam tel. Bas de Leede chuan ODI match-a vawm chhe ber record a siam - over 10-a vawmah run 115 lawih a pe a, wicket hnih chiah a la thei a ni.