City-in hna ngai an thawk

Manchester City-in Champions League-ah harsatna an la tawk lo - Young Boys chu khualmualah 3-1 in an hneh a, match thum an khelhah vawi thum an chak ta.

City tan Erling Haaland chuan goal hnih a khung a, Manuel Akanji chuan goal khat a thawh bawk - mualneitu Young Boys tan Meschack Elia chuan goal khat thawh ve mah se awmzia a nei phak lo a, hun tawp thlenga goal dang lut loin City an chak chiang.

Young Boys khelmual hi phul lem (artificial pitch) a ni a, natural grass hlira khel ṭhin City player-te tan a harsa dawn tih a chiang sa. Inkhelh hmain City manager Pep Guardiola pawhin hei hi a sawisel a, player inhliam hlauhthawnna nen City-in inkhel an hmachhawn.

City hian first half-ah goal an khung lo a, Young Boys hian an khelmual hmanthiama an khel chu an chhawr dawn niin a lang hman. Mahse, second half ṭan aṭanga minute thumna lekah City-in goal an khung a, a khungtu hi defender Akanji a ni.

Swiss Super League club Young Boys an beidawng duh bik lo. Goal an chhuah aṭanga minute li hnu lawkah Elia chuan mawi zeta Ederson pet khumin a khung ve leh a, 1-1 a ni.

Mahse, City an vannei. Mohamed Ali Camara chuan Rodri titluin penalty a chawi a, Haaland chuan minute 67-naah an hmahruai vawi hnihna ni turin goal-ah a chantir a, hun tawp nan minute li chauh a awm tawh tihah a belhchhah leh bawk.

Hun tawp thlengin goal dang a lut lo a, City an chak - champion lai Manchester City hi Champions League match an khelh hnuhnung 16-ah tlawm an nei lo a, vawi 10 chakin vawi ruk chu an khingpui an inhnehtawkpui. English club zingah chuan 2007-09 inkara Manchester United record chiah kha an tluk lo.

City hian artificial pitch-a an khelh bakah, inkhel tiharsa zual turin ruah a sur a, mahse, vanneihthlak takin City player zingah inhliam an awm lo - inkhelh hma aṭanga hlauthawng tawh City boss Pep Guardiola a thaw huai ang!

Spanish coach chuan, "He khelmuala inkhelh hi a harsa a, ball kal dan pawh a dik thei lo. Mahse, kan awmna tur takah awm zelin kan inkhel a, kan tiṭha hle a ni," tiin a sawi.

Group G inkhel dangah RB Leipzig chuan 3-1 in Red Star Belgrade an hneh a, German club tan David Raum, Xavi Simons leh Dani Olmo te chuan goal khat ṭheuh an khung a, Red Star tana Marko Stamenic goal khungin awmzia a nei phak lo - point kua neitu City chu hmahruaitu an ni zel a, Leipzig hian point ruk neiin an dawt.