Newcastle hnehtu Dortmund

Premier Lesgue club Newcastle United chanchin hian ngaihven a hlawh ṭhin, team nghet pangngai tak an indin tawh avangin inrintawkna pawh an nei sang - mahse Borussia Dortmund lakah goal an khung thei tlat lo.

Ruah sur vangin St James' Park a nal a, inkhelh a awlsam tawk lo deuh. Mikhual German club tan Felix Nmecha chuan minute 45-naah inkhela goal awmchhun a khung, mualneitu lamin a chhanletna an nei lo a ni.

Magpies hian hun rei tak hnuah Champions League an khel ve leh a ni a, an match hmasa berah AC Milan chu San Siro-ah an inhnehtawkpui a, chumi hnuah Paris Saint Germain an hneh - tunah erawh result ṭha an nei chhunzawm thei rih lo.

Eddie Howe naute hian match thum an khelh tawh chinah point li an nei a, table-ah pathumna an ni - an chunga awm Dortmund nen an point a inzat. Khelh hmabak match thum ṭheuh tho an la nei a, a hniam ber Milan (2 points) pawh a chung berah an la awm thei.

Magpies striker Alexander Isak chu hliam vangin minute 15-na lekah lakchhuah a ngai a, amah thlaktu substitute Callum Wilson chuan a khung teuh hle, mah se ani leh Anthony Gordon te chuan Dortmund keeper Gregor Kobel te an paltlang thei tlat lo.

English club tan pawh keeper Nick Pope a rim ve tho - Donyell Malen leh Niclas Fullkrug te khung tur chu a zawnin a dansak a, goal khat chhuah chu nei ve bawk mah se an lama lut tur a dang thei malh malh hle.

Newcastle manager Eddie Howe chuan, "Mahni khelmualah ngei kan chak lo, tunah chuan a zawnin khualmualah match hautak pahnih kan khelh a ngai dawn. Hliam vangin khelh dan phung thlak danglam kan ngai a, kha vang khan duh ang thlapin kan khel thei lo," a ti.

Dortmund coach Edin Terzic chuan, "First half-ah kan khel ṭha, chak zawk nih pawh kan phu. Second half-ah min rawn nawr dawn tih kha chu kan hre lawk a, chumi dang tura kan inbuatsaihna chu a hlawhtling," tiin a sawi.