Bethlehem leh Kanan ten phuba an la

ADFA First Division semifinal-ah FC Bethlehem leh Kanan FC ten league round-a an hneh loh Bethlehem Vengthlang leh Sihphir Venghlun te hnehin final an thleng. Final hi October 28, Inrinni chhun dar 12 hian Lammualah Bethlehem leh Kanan ten an khel ang.

Semifinal-ah hian First Division team intluk tawk tlanzia a lang a, minute 90 chhungin chak zawk an awm lo. Inkhel pahnihah extra time khelh ve ve a ni.

Derby chu

1st Bn MAP Ground-ah Bethlehem Derby khelh a ni a, league round champion BVT aiin FCB-in bul an ṭan ṭha zawk. Bethlehemin Ramthianghlima hmangin minute 17 lekah hma an hruai a, coach Lalhriatpuia Sailo hote a khel ṭha zawk an ni.

Mahse, PC Malsawmsanga hoten league round ang thoin tlawm an duh lo. Huaisen takin a tawp thlengin an bei a, injury time-ah pawh minute nganaah si phurh an sut.

Extra time khelh a ni a, a tawpah FC Bethlehem an vannei ta zawk. Second half-ah Laldinsanga Thangluahin chakna goal a khung. BVT-in final thleng lo mah se League round champion an nih avangin MPL Playoff khelh theihna ticket an nei tho.

Kanan hun

Kanan FC-in league round-ah Sihphir Venghlun an inlehthaltir a, semifinal-ah Chawngthansanga hote a lehthaltu zawk an ni. Sihphir Vengglun tan Ricky Lalramnghaka'n minute 18-naah hmahruaina goal a khung a, tun inelnaa a goal kuana a ni bawk.

Mahse, Kanan FC-in First Division-a goal khung thei ber Lalthuthlunga an kawl. Serchhip tlangval Thlunga hian minute hnih hnuah si phurh a sut. Tun inelnaah Thlunga hian goal 12 a khung tawh.

Champion duha tuihal Kananin training an nei ṭha a, nikum champion Sihphir Venghlun aiin an fitness a ṭha zawk. Minute 90 chhungin goal dang a luh belh tawh lo a, extra time-ah pawh minute 26 chhung goal hmuh a ni lo.

Minute 117-naah Thlunga hmangin Kananin penalty an beisei a, referee-in penalty pe lo mah se Mizo defender ṭha ṭhin Lalpianfela fapa R. Lalruatkima'n chakna goal a khung.