Celtic-in Atlético Madrid an chelh

Tun season Champions League-a an point hmuh hmasak ber ni turin Celtic chuan Atletico Madrid an chelh a, 2-2 in an inhnehtawk - Scottish club hian vawi hnih ngawt hma an hruai zawk hial a, an vanneih zan ni se chak thei dinhmunah an ding.

Celtic tan Kyogo Furuhashi chuan minute lina lekah goal hmahruai a khung a, Japanese striker hian tun season inelna hrang hranga match 13 a khelh aṭangin goal sarih a khung leh der tawh.

Atletico an beidawng lo. Minute 25-naah penalty an hlawh chhuak a, Greg Taylor chuan Nahuel Molina titluin penalty a chawi - a pet turin Antonie Griezmann a lo pen chhuak a, French forward hian a tirah a pet goal lo.

English keeper Joe Hart chuan Griezmann-a pet hi a dang zet a, mahse, a per lehlam chu Atletico Madrid forward hian harsatna nei loin goal-ah a chantir ta tho.

Celtic Park-ah thawm a reh a, beiseina nei lo erawh an ni lo. Goal an chhuah aṭangin minute thum a liam hman awrh a, Brendan Rodgers-a naute hian tlawm an duh lo tih a takin an lantir.

Honduran forward Luis Palma chuan goal kil sirah chiang zetin a thlawh lut ve leh a, 2-1 a ni. Goal dang lut loin chawlhlawk hman a ni a, chak beisei Celtic fan-te thawm pawh ṭha leh tawh tak a ni.

Mahse, Atletico-in Celtic laka tlawm tur niah an inngai lo a, second half-ah an khel ṭha sawt. Spanish striker 'form' êm êm Alvaro Morata chuan Marcos Llorente-a cross ṭha zet chu goal-ah a chantir a, hun tawp thlenga goal dang lut tawh loin 2-2 in an ṭin.

Atletico hian si phurh an sut zawh hnuah inkhel an thunun zui a, Angel Correa-a chance neih duhawm Hart-a'n a lo dansakte chu an ui vawng vawng ang - minute 82-naah Atletico midfielder Rodrigo De Paul chuan a yellow card pahnihna hmuin hnawhchhuah ni mah se, Spanish club an ṭang tlang a, team pahnihin point an insem.

Celtic boss Brendan Rodgers chuan, "Kan khel ṭha takzet a, mahse, hnehna kan chang zo ta ngang lo a ni. Khatiang taka ranga khelh kha harsa kan la ti a, a tawp lamah kan zuai ta deuh a ni - kan vanduai vang liau liauin penalty kan chawi bawk," a ti a, Atletico laka point an hlawhchhuah avangin beiseina thar an neih tur thu a sawi bawk.

Group E inkhel dangah Feyenoord chuan 3-1 in Lazio an hneh. Dutch team tan hian Santiago Giménez chuan goal hnih khungin, Ramiz Zerrouki chuan goal khat a thawh ve bawk a, hun tawp hnaih lama Pedro-a penalty khungin Lazio result a sawi danglam phak lo.

Match thum aṭangin Feyenoord hian point ruk neiin hma an hruai mek a, Atletico Madrid (5 pts), Lazio (4) leh Celtic (1) ten an dawt - Scottish club-in an beiseina thi tur an tinung ve hram hram e.