Bangalore-ah goal a lut lo

Nilaini zan khan Indian Super League inkhelah Bengaluru FC leh FC Goa an intawng a, goal khung loin an inhnehtawk - Goa hian match li an khelh aṭangin tlawm an la nei lo a, point 10 hmuin table chung ber an luah mek.

Bengaluru erawh match li an khelh tawhah vawi khat chiah an la chak a, table mawng lamah an awm mek. Bangalore club hian match khat chakin, vawi khat draw an nei a, vawi hnih an tlawm thung.

FC Goa tan Ayush Chhetri chu minute 70-naah bench aṭanga luhtir a ni a, Dinthar tlangval tan tun season-a ISL match a khelh hmasak ber a ni - season hmasaa league match khel kim vek Ayush hian tun season-ah club-ah hun a la hmang tam tawk lo.

AFC Under-23 Asian Cup Cup qualifier-ah India Under-23 squad a zawm a, tin, Asian Games-ah India U23 tan a feh chhuak bawk a, Aizawl FC midfielder hlui hian team zingah training a nei tam tawk lo a, Coach-in a nghak rih a ni ber.

Zaninah ISL match khat a awm dawn a, zan dar 8:00-ah midfielder Freddy Lallawmawma khelhna Kerala Blasters chuan Mizo pakua awmna Odisha FC an mikhual ang.