Chhinga Veng hnuaiah Durtlang!

Tualchhung cricket inelna First Division One Day Tournament 2020 khelh mekah Chhinga Veng chuan nimin khan Durtlang chu wicket riat ngawtin an hneh a, an elpui team lakah an chak lo chiang hle.

Ramhlun Sports Complex, Aizawla inkhelah Durtlang lam hi ṭhum vawrah an vannei a, vuak hmasak an thlang. An duh leh beisei ang erawh a ni lo, over 31.1 lekah run 63 chauh siamin an thi vek. Chhinga Veng tan target a hniam a, a harsa lo hle. Over 15.3 lekah wicket hnih hloh chungin run 64 an siam. 3C hian an match hmasa lamah Ramhlun Venglai an hneh tawh bawk avangin semifinal khel turin an dinhmun a ṭha tawh hle.

Durtlang erawh an match hmasa zawka Zemabawk an hmachhawn ṭum pawhin run 33 chauh an siam thei a, tun inelna bikah an batsman lam an che fuh thei lo - an tan semifinal beisei ngam a ni tawh lo ang.