Arsenal-in United rawlthar rual an hneh lo

Marcus Rashford-a'n goal hnih a khung bakah Ander Herrera goal khung tur siam sakin Manchester United-in Pathianni zan khan Arsenal chu Old Trafford-ah 3-2 in an hneh. Europa League-a Red Devils-in FC Midtjylland an lehthal ṭumin Manchester khaw tlangval hian goal hnih a khung tawh bawk avangin Rashford hian football khawvel a deng chhuak hneh hle.

United (reserve?) laka point hlawh chhuak zo lo Arsenal-in point 51 hmuin hmahruaitu Leicester City point ngain an pha lo. Gunners tan chuan Foxes laka an 'comeback' ṭuma an lawmna chu Hull City (FA Cup) draw, Barcelona (UCL) hneh loh leh Red Devils (Premier League) hneh loin a zui avangin lungawi lohnain a hliah khuh.

Rashford show

Kum 18 leh ni 120-a upa Rash-ford-a'n a vawi khat nan Premier League-ah a hmel a lan a, goal zawna a pet hmasa berah a pet goal nghal. Minute 29-naa goal hmahruai luh theih nana United wing back Guillermo Varela cross a mawi a, Arsenal defender Gabriel petchhuah ṭhat loh vang a ni.

Minute thum hnuah Jesse Lin-gard cross chu Rashford bawkin a tauh goal a, keeper Petr Cech a dem theih loh laiin Arsenal tlarhnung erawh sawisel theih tak an ni.

United tlarhnung phuahchawp erawh first half tawp hmain a lang a, Mesut Ozil-a freekick chu vengtu nei lo Danny Welbeck-a'n a tauh lut.

Arsenal hi goal khat vangin an phur phah chuang lo a, minute 65-naah Rashford-a'n cool taka Gunners penalty area-a ball a khawih hnuah Ander Herrera goal khung turin a siam sak.

United-in awlsam taka chak an hreh emaw tih theih turin minute 69-naah goal an chhuah a, Ozil-a finishing a ṭhat rualin Louis Van Gaal-a tan a tlarhnung chet danah lawmna tur a awm lo.

Arsenal-in result ṭha nei turin minute 20 zet la nei mah se an tih ṭhan dan pangngaiin Old Trafford-ah point thum hlawh chhuah tumna an nei lo. United 3-2 in an chak a, Gunners hian 2006 hnuah Old Trafford-ah chak an la nei lo.

Tu nge Rashford?

October 31, 1997 khan Man-ches-ter-ah Marcus Rashford hi a piang a, kum 18-a upa striker hi feet nga leh inches 10-a sang niin kg 70-a rit a ni.

Kum 2003 khan Rashford hian Fletcher Moss Rangers a zawm a, Machester chhim lama junior club hi Wes Brown, Ravel Morrison, Danny Welbeck leh Cameron Borthwick-Jackson te chher chhuaktu a ni.

Rashford hian 2005-ah United a zawm a, nikum November 21-a United-in Watford an hneh ṭum khan bench-ah awmin khelhna hun pek a ni lo. United-in Ningani zana Midtjylland an hmachhawn hmain Anthony Martial chu warm up-naah a inhliam a, beisei lo taka chance nei Rashford-a'n goal hnih khungin United tana European competition-a goal khung naupang ber a ni.

Rawlthar duhawm leh player man tlawm hre thei tak Arsene Wenger meuh pawhin Rashford hi United-in Danish club Midtjylland an hneh hnuah a hriat chauh avangin a lar hun chhung hi kar khat pawh a la tling loah a ngaih theih a, a daih chen tur pawh a hriat loh.

Van Gaal thar?

Dutch manager Louis van Gaal-a'n United khelh laiin a ṭhutna a chhuahsan meuh lo a, Arsenal an hneh zanah erawh field sirah kalin Alexis Sanchez chu tlu derah puhin fourth official hmaah uar takin a tlu der a, sawi zui a hlawh hle.

United boss chuan, "Ka ṭhutna ka chhuahsan ngai loh avangin min sawisel a, ka chhuahsan meuh chuan min sawisel leh tho bawk. Referee leh linesman chungah ngaihdam ka dil tawh a, ka player-te chungah pawh inthunun ka mamawh thu ka hrilh bawk," tiin a chet dan chungchang a sawi.

Goal khungtu chungchang sawiin Van Gaal chuan, "Rawlthar player-te hian an match hmasa ber an khel ṭha tlangpui a, vawi hnihna erawh an harsat ṭhin. Marcus hi a vawi hnih khelhnaah a che ṭha zawk a, talent nei ṭha tak a ni," tiin a sawi.

Rashford aia United tana Pre-mier League-a goal khung thei naupang chu Federico Macheda leh Danny Welbeck te chiah an awm. Inkhelh bana an lawm dan tur chungchang zawhna chu United forward chuan Chemistry exam an neih dawn avangin a lawm theih loh tur thu a sawi a, Varela pawhin exam a neih tho thu a sawi.

Arsenal ve thung

Manchester United laka Arse-nal an tlawm chiah khan Gunners ṭantu tan Arsene Wenger chunga rinna ngah chhunzawm zel a harsa ang. United tlarhnungah Michael Carrick leh Daley Blind an inkawp a, inliam tam vanga dah kawp an ni tih a chiang.

Left back-a awm dam kawr Marcos Rojo chu inhliam vangin kum 18-a upa Timothy Fosu-Mensah-a'n minute 55-naah a rawn thlak a, Dutch defender hi United tana a vawi khat khelhna a ni. Right back Guillermo Varela lah kum 22-a upa ni tawh mah se United tana a vawi hnih inlanna chauh a ni a, heti chung hian Alexis Sanchez erawh a dang hle.

Wing lama awm Memphis Depay leh Jesse Lingard te pawh player naupang tiha chhiar theih an ni a, champion tum Arsenal tan point thum hlawhchhuahna tur a ni.

Inkhelh hmain Arsenal boss Wenger chuan, "Tun hnaiah kan result ṭha lo mah se tun hi kan tan inkhel pawimawh a nih avangin theihtawp kan chhuah a ṭul a, kan zia lanna tur a ni," tiin a sawi.

Amaherawhchu Arsenal hian Old Trafford-ah champion zia an chhuah lo a, United hian minute 90 chhungin chak an phu hrim hrim. Gunners boss chuan inkhelh banah, "Player-te tumruhna leh inpeknaah chuan sawisel tur ka hre lo a, kan goal hnih chhuah dan erawh a nem hret a ni," tiin an goal chhuah dan chauh a sawisel.

Arsenal-in Nilaini zanah Swan-sea City an mikhual dawn a, an chak lo nawn a nih chuan cham-pion nomawi a hla sawt ang a, Wenger-a chungah Gunners ṭantute an hel chho leh ṭan ang. Arsenal an hneh vangin Louis van Gaal chu United hotuten an ban mai dawn lo tih a chiang a, amaherawhchu Dutch manager din-hmun hi Nilani zana Watford an hneh loh chuan a nghing leh nghal ang.