Zanin dar 8:00-ah chak mamawh Ryders vs Serpents

Zanin hian Mizoram Super League season 2 chu Hawla Indoor Stadium, Republic Vengthlangah khelh chhunzawm a ni leh dawn. An match hmasa bera hnehna chang zo lo pahnih Chaltlang Ryders leh Zarkawt Serpents te dar 8:00-ah an inkhel ang.

Season ṭan niah Ry-ders hi champion lai Khatla TBL lakah an chak lo a, Serpents pawhin an match hmasa berah Mission Veng Vikings an hneh loh bawk avangin zaninah hian chak loh nawn nih an duh lo ve ve dawn.

MSL1-ah Chaltlang Ryders hian vawi khat chiah hnehna an chang a, an hneh chu zanina an khelh tur Serpents hi an ni a, tun dinhmunah an player zingah hliam an awm loh avangin zanin hian ah huphurh hran lo ang tih a chiang. Hetih lai hian Serpents pawh hi season hmasa a TBL hneh theitu awm chhun an nih avangin team chhia an ni lo tih a chiang.

MSL2-ah semifinal a awm dawn a, a hniam pa-hnihin relegation playoff an khelh dawn bawk avangin mahni tiatpui nia lang team laka hnehna chan a hlu zual dawn a, zanin hi team pahnih tan in-siam-
ṭhat theihna hun a ni.

Eng nge an sawi?

Chaltlang Ryders assis-tant coach Peter Lal-rintluanga chuan,"Kan match hmasa berah cham-pion lai kan tum avangin kan nauten inrintawkna an nei tawk lo a, tunah erawh inbuatsaihna kan neih chhunzawm ṭhat tawh avangin zaninah hian hnehna chan theih kan beisei. Chaltlang mai bakah kan player-te awmna veng aṭangin min ṭantu tam tak an awm a, chumite lawmna siam sak ngei chu kan duh," tiin Vanglaini palai a hrilh.

Zarkawt Serpents coach Dino Laldinpuia Chhangte chuan, "Kan inkhelh dan leh player lut kan ti danglam dawn a, a hmasa ber a ni tawh dawn lo bawka a boruak pawh a danglam ngei ka ring. Min ṭantu te zarah hlawhtlinna chan theih ngei kan in beisei," tiin Vanglaini palai a hrilh ve bawk.