Goal khat bawkin Aizawl FC chak lo

Bengaluru FC-in Sree Kanteerva Stadium-ah C K Vineeth-a goal hmangin Aizawl FC chu Pathianni zan khan 1-0 in an hneh a, 2014 I League champion hian goal khat thoin RG Stadium, Mualpuiah MPL champion hi January thla khan an lo hneh tawh bawk.

Blues-in an match hnuhnung berah Lao Toyota an hneh lo a, Ashley Westwood-a'n starting eleven a thlak hlawk. Captain Sunil Chhetri, keeper Amrinder Singh, Seminlen Doungel, Udanta Singh, Keegan Pereira leh Malsawmzuala ten inkhel bul an ṭan a, squad-ah Beikhokhei Beingaichho, Lalchhuanmawia leh Alwyn George te an tel lo.

Aizawl FC-in Emmanuel Chi-gozie, Yuta Kinowaki leh David Lalrinmuana ten Mumbai FC an hneh ṭumin bul an ṭan lo a, Ben-ga-luru an hmachhawn ṭum hian Lalchhawnkima, Zoramthara leh R. Malsawmtluanga te aiah star-ting eleven-ah dah luh an ni a, Joel Sunday erawh bench-ah dah a ni.

Bengaluru-in inkhel bul an
ṭan ṭha a, goal chance nei hmasa zawk erawh Aizawl FC niin Albert Zohmingmawia ball pet chu keeper Amrinder-a'n a dang ṭha hle. AFC tan Alfred Jaryan leh H. Lalmuankima ten chance ṭha an hlah a, Bengaluru lamin counter attack hmangin chance an nei ve bawk.

Khualmualah Aizawl FC khel ṭha mah se an intawn hmasak
ṭuma an goal chhuah ang bawkin goal an chhuah leh a, Keegan Pereira freekick pet chu minute 48-naah CK Vineeth-a'n a tauh lut. ISL lama Kerala Blasters striker CK Vineeth hian goal hnihna khung theihna nei mah se goal zawnah a pet thei lo.

Darkar khat hnuah captain Chhetri chu inhliam vangin Daniel Lalhlimpuia'n a rawn thlak a, Aizawl FC-in goal khung tumin William Lalnunfela leh Joel Sunday te an luhtir ve bawk.

AFC hian hun tawp thlengin siphurh sut theihna hun ṭha an nei a, hnai tak
aṭanga Alfred-a pet chu keeper Amrinder-a'n a dan sak. Blues an ṭang tluan a, an mamawh point thum an hlawh chhuak.

Bengaluru boss Westwood chuan, "Kan game plan-ah kan chiang a, kan hlawhtlingah ka ngai. Set piece aṭangin goal kan khung a, open play aṭang pawhin goal khung thei kan ni. Aizawl FC player-te shooting a ṭha tih kan hria a, uluk takin kan veng a, goal kan chhuah lo," tiin a sawi.

Aizawl FC coach Jahar Das chuan, "Kan vanduai vangin point kan hlawh chhuak lo. Goal khung theihna tur chance kan nei a, a bik takin hun tawp dawna Alfred-a hlah kha a uiawm zual. Goal kan chhuah chhan kha tawnhriat kan ngah tawk loh vang a ni a, Bengaluru goal khung kha dan theih a ni," tiin point hmuh an phu thu a sawi.

Aizawl FC-in Nilaini zan dar 7:05-ah Mumbai FC an hma-chhawn ang a, Bengaluru FC pawhin hemi ni vek hian khual-mualah Shillong Lajong an hmachhawn ang.