Barcelona chelh thei an la awm lo

Pathianni zan khan Lionel Messi chuan tun season-a a goal 30-na a khung a, La Liga hma-hruaitu Barcelona chu Sevilla lakah 2-1 in hnehna a chanpui.

Barcelona tan match 34 chhung tlawm hmel hmu loa an kaltluanna a ni ta a, Messi-a tan season riat chhung a zawna goal 30 a khung tlinna chiah a ni bawk.

Nou Camp-a inkhelah beisei loh zawk Sevilla-in goal an khung hmasa a, Spanish winger Vitolo chuan minute 20-naah mikhual team tan goal hmahruai a khung.

Barcelona-in goal phurh rei an duh lo. Goal an chhuah aṭanga minute 11-naah Messi-a'n freekick aṭangin an si phurh sutna goal a khung a, Gerard Pique chuan minute 48-naah Messi siamsak chu goal-ah a chantir bawk.

Hun tawp thlengin goal dang a lut tawh lo a, Barcelona-in 2-1 in hnehna an chang. Inelna hrang hranga match 34 chhung tlawm hmel hmu tawh lo Barcelona hian La Liga cluib zingah Real Madrid record an nih rual chiah a, Real hi kum 1988-89 khan match 34 chhung tlawm hmel hmu loin an lo kaltluang tawh a ni.

Barcelona hnehtu hnuhnung ber chu Pathianni zana an hneh tak Sevilla hi an ni a, nikum Oct 3 khan an khelmualah Catalan club hi 2-1 in an lo hneh tawh.

Messi record

Barca thiampuipa Messi-a'n season riat chhung goal 30 a khung tling ziah a, season khata goal 30 a khung tlin inṭanna chu 2008-09 season kha a ni.

Kum 2008-09 chhung hian Messi-a'n Barca tan inelna hrang hrangah match 51 khelin goal 38 a khung. Kum 2009-10 ah vawi 53 inlanin goal 47 a khung a, 2010-11 ah match 55 inlanin goal 53 a khung.

Messi-a'n hniam lam aiin ropui lam a pan zel a, 2011-12 season-ah phei chuan match 60 a inlanah goal 73 a khung a, player ropui bik tan lo chuan season khata hetiang zat goal khung hi thil tih theih a ni lo.

Kum 2012-13 season-ah Messi-a'n match 50 a inlanah goal 60 a khung a, 2013-14 ah vawi 46 a inlanah goal 41 a khung.

Season hmasa khan Messi hian vawi 57 a inlanah goal 58 a khung a, tun season-ah hliamin a tibuai chungin vawi 33 a inlanah goal 30 a khung tling leh der tawh.

Enrique thukhawchang

Barcelona manager Luis Enrique chuan, "Record chung-chang sawi ka duh lo a, nomawi kan chawi a nih chuan a tawk mai. Sevilla hi tun hnaia min khing phak bertu an ni a, tun season-a Nou Camp-a team kan hmachhawn tawhah chuan an la ṭha ber a ni," tiin an khingpuite chu a fak.

Spanish manager chuan sawi chhunzawmin, "Sevilla khan goal an khung hmasak avangin game kha a harsa a, min hneh theihna tur khan hmun tin an dap a ni," a ti.

Valencia an tlawm

Gary Neville-a enkawl Va-len-cia-in match li chhung hneh loh tawng loa an kaltluan hnuah hneh loh an tawng ve ta a, an mikhual Athletic Bilbao chu 3-0 in an hneh lo.

Neville-a naute hian Bilbao an hmachhawn hma hian Europa League record siam turin inkhel pahnih belhkhawmah Rapid Vienna chu 10-0 in an sawp a, league match-ah Espanyol leh Granada an hneh bawk.

A naute chakpui zo lo Neville a thinrim a, English defender hlui chuan, "Referee khan fiamthu min thawh khum a ni. Athletic lamin goal an khung hma khan penalty hmuh ngei ngeina tur vawi hnih kan nei a, pek kan ni lo. Referee-te hi ka sawisel ngai lo a, mahse vawiina inkhel enkawltute chet dan erawh a demawm takzet a ni," tiin a lungawi lo hle.