Lyon-in Paris St-Germain an hneh

Paris St-Germain-in French Ligue 1-ah a zawna match 36 chhung teh meuh mai hneh loh nei loa an kaltluang lai chu a tawp ta! Pathianni zan khan Lyon lakah 2-0 in an chak lo a ni.

Lyon khelmuala inkhelah ṭan a ṭanga minute 13-na lekah Maxwell Cornet chuan goal hmahruai a khung a, Sergi Darder chuan chawlhlawk hma chiahin an goal hnihna a khung bawk. Champion lai PSG tan Lucas Moura chuan second half-ah goal khat khung ve mah se goal dang a luh zui tawh loh avangin Lyon-in hnehna an chang a, point 42 hmuin season thara Champions League khelh an beiseina an chhawm nung leh ta.

Lyon keeper Anthony Lopes chet ṭhat ni a nih avangin PSG hma-tawng Zlatan Ibrahimovic leh Edison Cavani ten goal khungna hun ṭha an neih an chhawr ṭangkai zo lo a, hliam vanga inkhel thei lo Angel di Maria inlan loh a hriat bawk.

Laurent Blanc-a naute hian league-ah ngam loh an tawng khat hle a, thla 11 liamta a Bordeaux 3-2 a an hneh loh hnua an chak loh lehna hmasa ber a ni.

PSG manager Blanc chuan, "Nilainiah Saint-Etienne nen kan inhmachhawn leh dawn a, vawiin kan inkhelh ang hi chuan kan khelh tawh loh ka beisei. Kan result hian min beng harh sela, inkhelh hmabakah min fimkhur tirtu nise a ṭha ang. A pumpui thlir chuan Lyon khan chak an phu e," tiin a sawi.

Inkhel dangah AS Monaco leh Nantes te chu goal lut loin an inhnehtawk a, Monaco hian point 50 hmuin table-ah pahnihna dinhmun an luah chhunzawm zel a, hmahruaitu PSG nen an inthlauhna erawh point 23 zet a la ni thung.