Juventus-in Inter Milan an hneh

Juventus-in Inter Milan an hneh Juventus chuan a zawna a vawi nga nana Serie A title la turin beiseina an nei sang tawh hle. Pathianni zan khan Inter Milan chu 2-0 in an hneh a, league table-ah point 61 hmuin hmahruaitu an nih chhunzawm zel.

Roberto Mancini nauten season thara Champions League khelh an tum tih a chiang a, goal khung aiin a venhmin lam an ngaipawimawh zawk a, minute 45 chhung an hlawhtling. Mahse, hun chanve hnu lamah erawh Juve an dang zo lo.

Turin-a inkhelah Italian defen-der Leonardo Bonucci chuan minute 47-naah goal hmahruai a khung a, Substitute Alvaro Morata chuan ama penalty hlawhchhuah chu goal-ah a chan tir bawk. Penalty hi Inter defender Miranda chawi a ni.

Juventus veteran keeper Gian-luigi Buffon chuan league-ah a zawnin minute 746 chhung goal a chhuah tawh lo a, ama mimal record ṭhat ber ṭum a hmang mek.

Juve hian point liin hma an hruai fal rih a, mahse zanina Napoli leh Fiorentina inkhel result a zirin an inthlauhna hi a danglam leh thei ang.

Chak lo Inter tan season thara Champinos League beiseina la bo lo mah se an hna a hautak tawh dawn, point 48 hmuin table-ah pangana dinhmun la luah mah se an chung chiaha awm Fiorentina chu point liin an phak lo a, an hnuai chiaha awm AC Milan nen point hnih chiahin an inthlau bawk.

Juve manager Massimiliano Allegri chuan, "Inter hi team ṭha an nih avangin season tawpah chuan a sang pali zingah an tel ngei ka ring. Vawiin khan ka nauten an khel ṭha hle a, vawi khat te te hnehna kan chan chhoh bek bek hian inkhelh tur a tlem zel a, hmabak kan hlen zel a ni," tiin a sawi.