League Cup champion Manchester City

Manchester City player man to rual karah pound maktaduai 6 man goalkeeper Willy Caballero-a langsar ber - Pathianni zan League Cup final penalty-a City-in Liverpool 3-1 a an hnehna inkhelah penalty vawi thum a dang a, League Cup nomawi an chawi.

City tan hun pangngaiah Fernandinho goal khung chu Reds tan Philippe Coutinho-a'n a sut a, minute 120 chhung goal dang a luh loh avangin penalty hmangin chak zawk zawn a ni.

Wembley Stadium-a in-khelah Argentine keeper hian Lucas, Coutinho leh Adam Lal-lana-te penalty pet a dang vek a, City tan nomawi a hlawh chhuak.

Inkhel chu

Manchester City-in goal khung-na chance an nei hmasa zawk a, David Silva through ball umtu Sergio Aguero-a'n Liverpool defender Mamadou Sakho a tlanpelh hnuah ṭha takin pet mah se Reds keeper Simon Mignolet-a'n a kut hmawrin a lo khawih hman a, goal post a per.

Jurgen Klopp-a'n Aguero veng hneh lotu Sakho a la chhuak nghal a, a team-mate Emre Can nen an intauh nat vanga talbuai defender hi a lungawi lo hle.

Goal awm loin chawlhlawk hman a ni a, inkhel boruak a nung tawk lo. Second half ṭan aṭanga minute li hnuah City-in Fernandinho hmangin goal an khung a, Brazilian midfielder goal khung hi awlsam taka dan theih niin lang mah se Reds keeper Simon Mignolet-a'n a hna a thawk ṭha tawk lo.

Raheem Sterling-a'n hun ṭha vawi hnih lai nei mah se goal-ah a chantir thei lo. Liverpool tan substitute Lallana leh Divock Origi-te khelmual chhunga an tlan luh hnuah Reds tlarhma a nung sawt a, minute 83-naah an si phurh an sut.

Daniel Sturridge-a ball cross Lallana pet chuan post per mah se a let lehlam Coutinho ke bulah a tla a, Brazilian midfielder hian an si phurh sut nan goal-ah a chantir.

Minute 120 chhung team pahnihin goal an khung loh hnuah penalty hmanga chak zawk zawn a ni a, Manchester City an chungnung zawk.

Penalty chu

Manchester City-in penal-ty an pet hmasa zawk a, Fernan-dinho-a'n goal post a pet per. Liverpool tan Emre Can-a'n 'cool' takin a pet goal a, a hnu lam erawh 'Caballero show' a ni.

City tan Jesus Navas, Sergio Aguero leh Yaya Toure-te'n pet goal vek mah se Caballero-a'n Lucas, Coutinho leh Adam Lallana-te pet a dan vek avangin City-in 3-1 in hnehna an chang.

Pellegrini rinna

Manchester City-in FA Cup fifth-round a Chelsea 5-1 a an hneh loh ṭuma keeper chu Caballero a ni a, Cup final meuha Joe Hart aia Pellegrini-a'n a ring zawk hian mak tih a hlawh hle.

Mahse, Chilean manager hian Malaga-a enkawl laia a keeper a thlang hi a tisual lo. Penlaty-a a team a chakpui bakah Argentine keeper hian Divock Origi ball tauh chu ṭha takin a dang bawk.

Season thara Manchester City chhuahsan tur manager hian City tan nomawi pathum a chawina a ni ta a, tun sea-son-ah Premier League leh Champions League-ah bei-seina sang tak an la nei cheu.

Hriatthiam har Mignolet

Liverpool keeper Mignolet-a'n holam taka Fernandinho goal shot a chhuah hnuah ropui tak taka dan a nei nual a, Aguero-a tih beidawn bakah Reds goal bul buai nuai karah huaisen taka dive-in goal theihna lakah Liverpool a chhanhim bawk.

Anfield-a kum nga dang cham tura contract thar ziak hlim keeper hian Jurgen Klopp-a rinna hlawh zel tur erawh chuan game pawimawhah holam taka goal chhuah loh a zir a ngai ang.

Sterling-a lawmna

Manchester City-in Lea-gue Cup final-a Liverpool an hneh avanga lawm fal an awm a nih chuan Raheem Sterling a ni ngei ang.

English forward hian goal ruaka a khung loh bakah Aguero pek ṭha tak chu goal-ah a chantir thei lo bawk a, City hian hnehna chang lo ngat se chuan pound maktaduai 49 man Sterling hi kawh rawn tur a ni.

Liverpool fan-te'n ball a chan apianga an auh el winger hian insiamṭhatna tur a nei a nih chuan a finishing tawih lo lutuk hi in enchian a ngaihna lai niin a lang.

Eng nge an sawi?

Liverpool boss Jurgen Klopp chuan, "Kan hnual em em a, mahse kan din chhuah a ngai a ni. In dawm kun a, nguai reng tur chuan mi mawl tak nih a ngai. Hnehna chan loh hrehawm zia kan hria a, kan tho chhuak leh ang. Zanin hi hun duhawm a ni lo ngei a, mahse naktuk aṭang chuan engkim a danglam leh tawh ang," tiin an chak loh vanga hnual mai tur an nih lohzia a sawi.

German manager ṭawng-kam thiam tak chuan sawi chhun-zawmin, "Hmalam kan pan zel ang a, nitinin a hma aiin kan
ṭha zel ang. Theihtawp chhuahin hna kan thawh chhunzawm dawn a, chawl hman kan ni lo. Thim chhah tak tawpah eng a awm ṭhin a, chu chu kan tana pawimawh ber chu a ni," tiin an hmalam hun eng takin a thlir.

Man City boss Manuel Pel-legrini chuan, "Kan chance hloh zozai kha ka rilru luahtu ber chu a ni. Extra time-ah erawh kan khel ṭha zawkin ka hria. Zanin hi kan tan chuan hun duhawm tak a ni a, Wembley-a nomawi chawi hi chu a nuam
ṭhin a ni," tiin an champion chu a lawm thu a sawi.

Inkhel chhehvel

• Manchester City-in League Cup final vawi nga an khelhah vawi li (1970, 1976, 2014 leh 2016) nomawi an chawi thei.

• Liverpool tan League Cup final-a vawi li (1978, 1987, 2005 leh 2016) an tlawmna a ni thung.

• Philippe Coutinho-a'n inelna hrang hrangah Manchester City hi vawi ruk a hmachhawn tawh a, goal nga a khung.

• Liverpool-in inelna hrang hrangah penalty vawi 18 an hmachhawn tawh a, City an hneh loh hi penalty a vawi li an tlawmna chiah a ni.

• Reds hian City an hneh loh hma hian Cup final-a penalty vawi nga an hmachhawnah hnehna an chang vek.

• Jurgen Klopp-a'n manager a nihna angin a season hnuhnung pangaah Cup final vawi nga a khel thei a, mahse vawi khat chiah nomawi a chawi thung.