East Bengal leh Bagan inlan dawn

Vawiinah I League in-khel pahnih a awm dawn a, Goan club-te'n Kolkata club an mikhual ang. Zanin dar 06:30-ah Sporting Goa chuan Mohun Bagan an mikhual dawn a, Salgaocar chuan dar 7:05-ah East Bengal an mikhual bawk ang.

Inkhel hi pakhat chauh live-a pek chhuah a ni dawn a, Sporting Goa leh Mohun Bagan inkhel hi Ten Action-ah en theih a ni dawn.

East Bengal mikhual tur Salgaocar hi Kolkata club Mohun Bagan laka 3-1 a tlawm hlim an ni a, vawiin tlaiah insiamṭhat an tum ang.

League table-a a mawng-phah luah mektu Salgaocar hian vawi kua inlana goal kua khung thei Darryl Duffy an nei a, East Bengal-in vawi riat inlana goal sarih khungtu Ranti Martins an nei bawk.

Mohun Bagan tan I League-a an hma-hruaina chhawm nung zel turin chak a pawimawh dawn. Bagan tan Trinidadian striker Cornell Glen leh Mizo tlangval Jeje Lalpekhlua-te an pawimawh lehin a rinawm a, Sporting Goa-in match kuaa goal nga khung tawhtu Odafa Okolie an neih ve tho avangin an zam bik lo ang.