Mizoram leh Railways an inhnehtawk

Santosh Trophy vawi 70-na chu nimin khan Nagpur-ah khelh ṭan a ni a, Mizoramin an match hmasa berah Railways lakah point khat hlu tak an hlawh chhuak.

Inkhel dangah Maharashtra-in Jammu & Kashmir chu 3-1 in an hneh bawk.

Inkhel an ṭan e

Nagpur University Stadium-ah 2014 Santosh Trophy final-a inhmachhawnte kum thum chhunga a vawi thum nan an intawng a, a zawna vawi hnih chak tawh lo Railways-in chak ngei an tum a, inkhel thununtu an ni bawk.

First half-ah Railways-in ball an chang tam a, goal hmaah Mizoram an hlauawm hret. Bethlehem VT forward MS Dawngliana a khel ṭha a, Chanmari FC forward Malsawmfela ball pet kawh ṭha tak chu Railways keeper-in a dang.

Mizoram an him hram

Second half-ah Railways-in goal an khung hma a, Mizoramin goal mamawh mah se Railways-in inkhel an thunun chhunzawm.

2014 champion Mizoramin chak loh an duh lo a, Lalfakzuala leh Joseph Lalnunpuia te aiah R. Laldanmawia leh Lalkhawpuimawia te an lut a, an nawr na sawt a, goal an khung dan erawh vanneih vang a ni thung.

Injury time-ah Railways defen­der a handball a, tawnhriat nei ṭha Sawmfela'n penalty aṭangin chiang takin an si phurh a sut. Goal dang luh belhna tur hun a awm tawh lo a, 1-1 in an inhnehtawk.

Group thlirna

Group A team-te hian Nilainiah an match hnihna an khel dawn a, Mizoram erawh an awl dawn avangin Zirtawpniah inelna thlengtu Maharashtra an hmachhawn leh chauh ang.

Nilaini hian champion lai Services leh Jammu & Kashmir an inkhel ang a, Maharashtra leh Railways te an inhmachhawn bawk ang. Group-ah team panga awmin a sang pahnihin semi final an lut dawn a ni.

Eng nge an sawi?

Mizoram manager T. Vanlal­hluna chuan, "Railways ṭhat ber
ṭum a ni hial ang. An inpuahchahna ṭhatzia kan sawi a, an khel pawh a ṭha khawp mai. Inkhelah kan chungnung lo zawk a ni," tiin an vannei tih a pha lo.

Vawiin inkhel tur

Vawiin hian Group B team-ten an match hmasa ber an khel dawn. Santosh Trophy-a record nei
ṭha ber West Bengal leh Goa an inhmachhawn ang a, Tamil Nadu leh Assam te an inkhel bawk ang. Group pakhatah hian team panga zel an awm a, vawiin hian finalist Punjab an awl ang.